Gandhi family-a mi ni lo INC president a ni dawn tih a chiang tawh - Lalsawta

Indian National Congress president tur thlanna nimin khan India ram state leh union territory hrang hrangah neih a ni a, Mizoramah pawh neih niin, Congress Bhavan-ah vote thlak a ni. MPCC president Lalsawta chuan, Gandhi chhungkuaa mi ni lo INC president a ni dawn tih a chian tawh thu a sawi.

INC president thlannaah hian chawhma dar 10 aṭanga tlai dar 4 thleng vote thlak hun hawn a ni a, state pradesh cong­ress committee aiawhte’n vote thlakin, India ram pum­ah vote thlak thei mi 9,000 vel an awm.

Mizoramah chuan nimin (Thawhṭanni) kha party chhung inkhawm neih hun a nih avangin chawhnu dar 1 aṭangin vote thlak ṭan a ni a, Mizorama Congress party hruaitu mi 71-in vote an thlak. Vote tlate chu October 19, 2022 khian INC hmunpui, New Delhi-ah chhiar a ni ang.

Zawhna chhángin MPCC president Lalsawta chuan, Gandhi chhungkuaa mi ni lo president an nei dawn tih a sawi a, "Tun hma pawhin Gandhi chhungkaw páwn lam mi INC president kan nei fo tawh a, tunah pawh hian Gandhi family ni lo president kan nei dawn tih a chiang," a ti. 

Congress party hi nasa takin a insiamṭha mek a, hruaitu pawh kan inthlak chho zel ang. India rama BJP rorelna ṭha lo tak paih thla turin kan insang mar mek a ni," a ti. Lalsawta chuan, BJP chu tunah lian leh ropui angin lang mah se, politics-ah chuan zan khat thil thu lekah inthlakthleng nasa tak a awm thei tih a sawi a, "Secularism hi Congress party dinna leh India ram nihphung nghet tak a ni a, chu chu BJP-in nasa taka sâwi nghîngin, Hindu lalram din tumna lian tak a awm mek. Hetiang avanga Kristiante mangang ṭawngṭaina Pathianin a la chháng ngei dawn," a ti a; BJP chu an sorkar kumkhua dawn loh thu a sawi.

MPCC President chuan, Mizoram Congress chu Delhi-ah a innghat lo nia sawiin, "Mizorama Congress party chak leh chak loh hi Delhi-a kan dinhmunin a hril lo a, kan innghahna chu Lal Isua leh Mizoram mipui an ni. Election manifesto pawh Mizoram mil tura siam a ni a, Mizoram tana ṭha tur nia an hriat chu Mizoram mipuiin an thlang mai ṭhin," a ti.