Mizoram Police Sports Meet ṭan a ni ; Sports hi industry lian a ni tawh - CM

Mizoram Police Sports Meet vawi 20-na chu nimin khan Rajiv Gandhi Stadium-ah hawn a ni. Meet hawngtu chief minister Zoramthanga chuan, sport chu industry lian leh pawimawh a nih tawh thu a sawi.

Chief Minister chuan, infiamna theite'n cheng nuai tél an la lut ruih ruih tawh tih sawiin, "Industry lian leh pawimawh a ni tawh. Sport hi hna hmuhna atan a ṭangkai hle. Company, police, army, para military-ahte sport theite tan chuan kawng thui tak a inhawng vek a ni," a ti.

Infiamna chu kawng hrang hrangin a ṭangkai hle tih sawiin Zoram­thanga chuan, "Sport hian ruih theih thil leh thil dang lakah min insûmtir a, eizawnna ṭha min siamsak a, rilru tihriseltu ṭha tak pawh a ni. Khawtlang nun siam­ṭhatna atan pawh a ṭangkai," a ti a, hnam chang­kang apiangin infiam­na an uar thu a sawi.

CM Zoramthanga chuan, Covid-19 vanga sum harsatna avangin police post ruak hmun thuma ṭhena hmun khat hnawhkhah theih loin a awm tih a sawi a, "In quarters-te pawh a chhe tawh hle. Sorkar laipui lamah project siamin, pawisa hai chhuah tumin hma kan la mek. Eng emaw chen a hlawhtlin ngei kan beisei," a ti.

Director general of police (DGP) Devesh Chandra Srivastava pawhin thu sawiin, police post ruak hnawhkhah loh a tam thu a sawi a, "Hengte hi hnawhkhah theih ni se a duhawm hle. Police quarters-te a chhe tawh hlawm hle a, police-te tihphûrna atan pawh chei ṭhat a hun tak zet a ni," a ti a; district thar pathuma police-te'n hmunhma, hmanrua leh bungrua an la neih chhiat thu a sawi.

Mizoram Police Sports Meet-ah hian police-te chu hlawm 11-ah inṭhenin, infiamna chi hrang hrang 19-ah an intihsiak dawn a; group tinte chu SP/commandant-in an ho zel a ni.