MLA-in intodelh inzirtirna a hawng

Aizawl North-II bialtu MLA Dr Vanlalthlana chuan nimin khan a bial chhunga Republic Higher Secondary School-ah intodelh inzirtirna a hawng a; Aizawl Venglai Middle School hnenah MLA fund hmanga lei computer a pe bawk.

Dr Vanlalthlana chuan, intodelh inzirtir tura pilot project atana Tharthilthlentu (TiLi) leh Republic HSS leh Hrangchhuana H/S ten hma an laho thei tur chu lawmawm a tih thu sawiin, "Kan zirna hi hna zawng tur ni loa intodelh tur zawka kan her danglam hret hret a ngai tawh. 'Eng nge i nih dawn,' tih ai chuan, 'Eng danglamna nge thlen i tum a, eng harsatna awmte nge i sutkian dawn,' tia kan inzawh a hun tawh a ni," a ti.

Intodelh inzirtirna kawnga Aizawl North-II bial chhunga hmalakna turin TiLi chuan republic HSS leh Hrangchhuana H/S-te thuthlung a ziahpui a; zirtirna pe tur chu TiLi-in an buaipui dawn a, MLA fund aṭangin sum mamawh angte pek a ni ang.