Minister-in ZMC Week a hawng

Zoram Medical College Week Exilcir 2022 chu nimin khan Sports minister Robert Romawia Royte-in Lammualah a hawng. Minister chuan, National Education Policy 2020 duh angin, zirna-inte'n infiamna an uar a ngaih thu a sawi.

ZMC Week hawnna inkhawm hi ZMC director Dr Zohmingthanga'n a kaihruai a; Robert Romawia Royte chuan, "ZMC hi Covid-19 hripui lèn tirh aṭanga a tàwp thlenga huaisen taka nun tam tak chhan nana ṭang ngam a ni a, anni hi kan Covid hero dik tak an ni," a ti.

Robert Romawia chuan, Mizoram chu India rama state fit ber, mipui pawh India mipui zinga fit ber ni tura ṭan lain Mizoram sorkarin Fit Mizoram Movement a kalpui tih a sawi a, "Covid léng karah pawh hmasawnna duhawm tak tak kan hmu zel. Sport hi zirna péng pawimawh a nih tawh avangin uar deuh deuh a ṭul a, National Education Policy duh angin zirna-inte'n sport an uar a ngai tawh," a ti a; hmasawn turin hrisel leh chak a ṭul thu a sawi.

ZMC chu Mizorama medical college awm chhun a nih avangin a ṭhan zel dan tur sorkarin a ngaihtuah tih sawiin Minister chuan, "Mizoram sorkar chuan ZMC zirlaite tana a ṭhat ber dan tur te, thawktute tana a ṭhat ber dan tur leh mipui tana a ṭhat ber dan tur zel a duh a, hma a la zel ang," a ti.

ZMC-ah hian MBBS zirlai 395, zirtirtu 90 leh thawktu dang 417 an awm mek a ni.