MP model village Seling sawiho

Aizawl District Committee on Sansad Adarsh Gram Yojana (SAGY) Phase VI model village Seling chu nimin khan Aizawl SP conference hall-ah Lok Sabha MP C Lalrosanga hoin an ṭhukhawm a, Aizawl district bawrhsap Dr Lalhriatzuali Ralte, sorkar hotute leh Seling khawtlang hruaitute an tel.

Ṭhutkhawmah hian Seling khaw hmasawnna tura Village Development Plan duan pawm a ni a; Plan-ah hian khaw chhunga kawngpui te, Seling tui lâkna Phase-I siamṭhat te, ruahtui khawlna tur siam te, anganwadi centre siamṭhatte a tel. Seling tan Village Development Plan dang siam belh a ni bawk.

MP C Lalrosanga chuan, Seling tan kawng hrang hrangin hmasawnna ruangám ṭha tak siam a nih thu sawiin, "Tihlawhtling tur chuan khaw mipui an pawimawh a, khawtlang hruaitute'n khaw dangte tana entawn tlak ni tura theihtawp in chhuah a ṭul," a ti.