Ni 568 hnua a vawi khat nan Covid-19 positive hmuh a ni lo

October 16, Pathianni khan Mizoramah swab sample 10 endik ni mah se, Covid-19 vei hmuh chhuah a ni lo a, March 28, 2021 hnua hripui vei hmuh chhuah loh ni hmasa ber a ni.

March 28, 2021 khan Mizoramah sample 238 endikah Covid-19 positive hmuh a ni lo a, chutih lai chuan hripui vei enkawl lai mi 26 an awm. Nikum March 28 hnuah ni tin Covid-19 positive hmuh belh a ni char char a, nikum March 28 aṭanga ni 568-na, October 16, 2022-ah a vawi khat nan Covid-19 vei hmuh chhuah a awm lo leh chauh a ni.

IDSP aṭanga thu dawn danin, Covid-19 vei inenkawl zinga mi 11 chu nimin khan chhuahtir an ni a, hripui vanga thi an awm lo. Nimin tlai khan Covid-19 positive mi 50 an awm mek.

Mizoramah swab sample 19,85,986 endik tawh niin, Covid-19 vei 2,38,680 hmuh chhuah a ni tawh a, 12.02% a ni. Nimin tlai dar 4 thlengin mi 2,37,907 (99.68%) chhuahtir an ni tawh a, mi 723 (0.30%) thi tawhin, enkawl mek mi 50 (0.02%) an awm.

Mizorama district 11 zingah Siaha, Kolasib, Lawngtlai leh Hnahthial district-ah Covid-19 vei an awm tawh lo a, Champhai leh Serchhip district-ah pakhat ve ve chiah an awm. District pahnih - Aizawl leh Saitualah chiah mi 10 leh a aia tam an awm tawh a ni.