KHAWTHLIR

Cyber Crime & Security awareness
Central YMA leh National Institute of Electronics and Information Technology (NIELIT), Aizawl thawhhona tur Cyber Crime & Security Awareness Workshop chu October 14, 2022 zan khan Central YMA general secretary Prof. Lalnuntluanga'n a hawng. Hawnna inkhawm hi CYMA Hall-ah neih a ni. CYMA leh NIELIT hian May 2022 khan kumin chhung daih tur MoU an ziak a, awareness campaign hi Aizawla YMA branch 13-ah neih zui tur a ni.

Faina hnatlang
Aizawl Two Wheeler Taxi Association, Bethlehem Vengthlang chuan nimin khan faina hnatlang an nei a, mi 35 vel an thawk chhuak. Bethlehem Vengthlanga Sahuan hlui aṭanga Chite lei inkara bawlhhlawhte an tifai a; chawhnuah intihhlimna leh infuih tharna hun an hmang bawk.

MLA-in MSU tlawh
MNF ṭhalai president L Thangmawia, MLA chuan nimin khan Mizo Student Union pisapui a tlawh a, ram leh hnam thil chi hrang hrang an sawiho. L Thangmawia chuan, MSU-te'n Mizo ṭawng 8th Schedule-a dah tura thu an tihtluk avangin lawmthu a hrilh a, "Mizo ṭawng hi Pathianin Zo hnahthlakte tana kan ṭawng pui ber atana min pek a ni a, Mizote min ṭhen darhtu ni lo a, min tipumkhattu atan kan hman thiam a ngai," a ti.

Kawng khâr dawn
Ramthar Tlangveng aṭanga Sihpui inkar kawng chu PWD-in vawiin aṭanga an siam dawn a, hei vang hian kawng siam zawh a nih hma chuan ni tin zing dar 9:30 aṭanga tlai dar 4 inkarah khâr a ni dawn. Dawrpui Vengthar aṭanga Dinthar panna péng leh Dinthar kâwn inkar kawng pawh vawiin leh naktuk hian PWD-in an thawm ṭhat dawn avangin zing dar 9:30 aṭanga tlai dar 4 inkarah khâr a ni dawn bawk.

Inthiarfihlim turin mipui chah
Champhai District Task Force on Anti Tobacco chu nimin khan an chairman James Lalrinchhana, bawrhsap kaihhruaiin DC conference hall-ah an ṭhukhawm a, hmalak dan tur an sawiho. Dan loa ram dang meizial lak luh, tawlh leh zawrhah inthiarfihlim turin Champhai district mipui an chah a ni.