Tun thlaah Tlawva SHP siam zawh beisei

Project atan hian sorkar remtihnain NABARD-in a phal chin nuai 5,140.49 loan lâk a ni a; Ministry of New & Renewable Energy (MNRE)-in kalphung a neih angin central assistance nuai 700 hmuh aṭangin nuai 630 pek chhuah a ni tawh a, project tihpuitlin a nih hunah final instalment nuai 70 chu pek chhuah leh a ni ang. State matching share aṭangin nuai 1,499.51 hmuh a ni tawh bawk.

Nortech Power Project hian hna thawh zawh hun bitukah an thawk zo lo hle a, an thawh muan avangin sum tam tak chawi zel tur an nih laiin, hun pawhsei an dil zel avangin sum chawi loin pawhseisak zel an ni. Project atan hian March 2012-ah contractor-te nen agreement ziah a ni a, thuthlung ziah aṭanga thla 36 (kum 3) chhunga zawh tur a nih laiin, March 2015 thlengin 20% pawh an thawk hman lo. Zawh hun hi ṭum ruk dang - December 2016, December 2018, June 2019, September 2019, June 2020, July 2020 thlengte pawhsei leh a ni.

R Lalrinkima sawi danin, Tlawva SHP peih a nih hunah Tlawva aṭang thoin project pènhleh, kawlphetha kilowatt 500 siam chuah theihna tur siam leh tum a ni a, P&E department-in rawtna an siam chu Assembly Subject Committee II-in an thláwp a; Mizoram sorkar chuan project pènhleh leh sum ruahman nuai 412.30 chu kum 2017 khan administrative approval a pe tawh. Cheng nuai 412.30 aṭanga MNRE tum tur chu nuai 375 a ni a, Mizoram sorkarin nuai 37.30 a tum ve thung ang.