A thlawnin phaiah naupang 15 zai dawn

National Health Mission (NHM), Mizoram hnuaia Rashtriya Bal Swasthya Karyakram (RBSK) chuan, lung ná (congenital heart disease) nei naupang 15 chu Manipal Hospitals, Bangalore-a zai turin October 23, Thawhṭanni khan a tír.

Congenital heart disease enkawl dan turah hian Mizoram NHM leh Manipal Hospitals, Bangalore hian August 28, 2017-ah inremna an lo ziak tawh a; inremna angin, October 5, 2017 khan Manipal Hospitals-a cardiac surgeon Dr Lal-chand H Bandagi leh a team-te chu Mizoramah lo kalin, Congenital Heart Disease Screening Camp an buatsaih a, Health minister Lal Thanzara'n a hawng a ni.

Congenital Heart Disease Screening Camp-ah hian naupang 167, nausen aṭanga kum 18 inkar an inentir a, chu'ng zinga naupang 49 chuan congenital heart disease an nei a ni tih hmuh a ni. Naupang 49 zinga 15 chu zai ngai an ni a, a bak 34-te chu la nghah hret theiha ngaih niin, a ṭul dan azira la enkawl theih tur an ni.

Bangalore-a inenkawl tura naupang 15 tirhte hi a hmain cardiologist Dr Loncy V Lalzarliana'n a lo en tawhte an ni hlawm a, phai lama inenkawl tura tih (refer)-te ni mah se, sum lam harsatna vanga kal thei lote an ni hlawm. Manipal Hospitals hian naupang 15-te an enkawlna man chu Mizoram NHM aṭangin an dawng dawn a, damlote'n inenkawlna man an chawi dawn lo a ni.

Naupang 15-te hi Mani­pal Hospital-a an inenkawlna man bakah, Guwahati leh Bangalore inkara rêl chuan man leh Bangalore-a thlen mante pawh NHM-in RBSK kaltlangin a tumsak dawn a; inremna angin kum 7 hnuai lam tan attendant pahnih leh kum 7 chung lam tan attendant pakhatte kalkawng leh thlenna senso pawh RBSK aṭanga pek a ni ang.