Kawng engkima hmasawnna nei turin Politics hi hmanraw ṭha a ni - MPC President

MPC president Lalhmangaiha Sailo chuan, politics chu ram rorel dan tur ngaihtuahna a nih thu sawiin, "Ram leh mipuiin kawng engkima hmasawnna nei tur hian politics hi hmanraw ṭha tak a ni thei," a ti.

Nimina MPC pisaa an party zawm thar lawm luhna inkhawmah Lal­hmangaiha Sailo chuan, ruling party thau sawh duh vangte leh mahni mimal dinhmun sawh ngheh nantea Congress party-a inpe an awm ṭhin lai a, chutiang lungkham duh loa MPC party zawmtute chu mi rinawm an nih thu a sawi.

Politics dikah chuan ram leh mipui dah pawimawh a ni tih sawiin Lalhmangaiha chuan, mipuite'n hmasawnna leh ṭhanna an nei thei dawn tih a sawi a, "Chumi atan chuan MPC chuan policy ṭha tak kan nei sa, Six Basic Needs hi a ni. Leh lamah chuan politics hi mimal hamṭhatna atan chauh pawh a hman theih, mahse, hetiangah hi chuan ram leh mipuiin hlâwk­na an nei ngai lo," a ti.

MPC President chuan, kum 30 chuang Congress leh MNF party-te kaihhruai sorkarah ram leh mipui an hlim tâwk em, ramin hma a sawn em tih chu, ram dinhmun a ṭhat tâwk lohzia mipuiin an hre vek niin a sawi a; Congress leh MNF party-te chu hnâwl tawh tur leh sorkar ṭha din tura mi ṭhahnemngai rualte intêlkhawmte thawhhohna ZPM chu sorkarna siamtir turin mipui a sáwm a ni.

MPC thuchhuah chuan, an party zawm thar an lawm luh zingah hian PC Lalrinmawia, MPS (rtd.) pawh a tel niin an tarlang.