Lianchhiari Rûn - Multi-Facility Centre IPR building hmun­ah sak a ni dawn

Information and Public Ralations (IPR) department chuan an directorate building hlui, kum 40-a upa ṭhiah tur pualin nimin khan hun an hmang. Building hlui hmunah hian North Eastern Council (NEC) aṭanga sum hmuh hmangin 'Lianchhiari Rûn - Multi-Facility Centre' sak tum a ni.

IPR director Lalni­thangi chuan, kum tam tak an luah tawh in ṭhiah a ni dawn ta chu a thawktute tan uiawm thei mah se, thil ṭha zawk leh hmasawnna lian zawk, mipui tana zau zawk leh hlâwk zawka rawngbawlna tur a lo inhawn theihna tur a nih avangin lawmawm a tih thu a sawi.

MJA president Vanlalrema Vantawl pawhin thu sawiin, "Department leh mipui tana ṭangkai tak tur building thar sak a la ni tur hi a lawmawm hle. MJA leh IPR department-in thawhhona ṭha tak kan neih ṭhin hi chhawm nun zel a nih a, thawhhona ṭha tak neih chhoh zel a nih ka beisei," a ti.

Lianchhiari Rûn Multi - Facillty Centre sak tur hi chhawng sarih tur a ni a, hmun thum aṭanga motor luh leh chhuah theih a ni ang. In hnuai lam chhâwng li chu motor dahna atan ruahman a ni a; a chung lam chhawng thumah conference hall, mini film theatre, art gallery, editing room/archive hall-te awm tur a nih bakah, a chung zâwl (terrace) chu exhibition hrang hrang neih theihna tura ruahman a ni.