Motor intlân chhâwk kalpui a ni zel dawn

Home minister R Lalzirliana hoa October 23, 2017-a a pisaa Coordination Committee on Traffic Management hotute ṭhukhawm chuan Aizawl khawpui tihziaawmna atana lirthei intlan chhâwk / indin chhâwk chu chhunzawm zel an rel.

Meeting chuan, kumin October thla chhunga enchhin mek, Aizawla lirthei intlan chhâwk chu thu dang a awm hma chuan kenkawh chhunzawm zel an rêl a; thla khata ni 31-naah intlan chhâwk kalpui loh leh, lirthei enchhin mekin a huam, traffic police duty turte lirthei chu intlan chhâwkah huamtir tawh loh an rel bawk.

Motor registration number digit hnuhnung ber mila intlan chhâwk hi October thla tir aṭang khan kalpui a ni.

Meeting-a an rel zingah, private leh sorkar motor intlan chhawk meka chhiat ni ṭhat nia motor tlan chhuah dan tur te, district dang

aṭanga sorkar thil pawimawha duty Aizawla tlan luh theih dan tur te, rualbanlote'n ngaihhnathiamna (exemption) an dil chungchang te, Aizawl City Bus Owners’ Association-in city bus neitu/enkawltute awmna veng local council-in dah an phalna lai kawng zau lai leh remchang lai an lo kawhhmuhte garage anga pawmsak chungchangte a tel.

Coordination Committee on Traffic Management-in an relte chu hmalak dan turah chiang zawkin order chhuah a la ni dawn a; Aizawl traffic tâwt lutuk tihziaawmna tura sorkar thuchhuakte chu thláwp turin mipui an ngen nghal.

Meeting-ah hian Finance minister Lalsawta leh UDPA minister Zodintluanga te pawh an tel a; Home department, Transport department leh Aizawl Municipal Corporation hotute leh NGO ṭhenkhat hruaitute pawh an tel a ni.