KHAWTHLIR

Kawng khâr hun
Lunglei SP chuan thupek chhuahin, World Bank Road, Pukpui leh Mausen inkar siam mek a nih avangin, zing dar 9 aṭanga tlai dar 5 thleng kawng khâr ṭhin a nih thu leh, tlai dar 5 aṭanga zing dar 9 thleng kawng hawn a nih thu a tarlang a, "Maxicab chin hnuai lam Aizawl aṭanga kal leh Aizawl lam pana tlante chu Haulawng-Dawn kawngah tlan vek tur a ni," a ti. Thupek hi nimin aṭang khan hman ṭan a ni.

Mamitah seminar
Mamit College-a Department of History chuan, nimin khan Mamit IPR conference hall-ah 'Development of Administration System in Mizoram Up to the end of the British period' tih thupuia hmangin state level seminar an buatsaih a, college zirlaite leh zirtirtute telin, thupui ṭhen hrang hrang hmanga mithiamte thuziah zirho a ni.

West's Impress
Aizawl West College-a Internal Quality Assurance Cell (IQAC) chuan nimin khan an college-ah West's Impress an buatsaih. He hunah hian Rev.Dr Vanlalnghaka leh Prof. HKLaldinpuii Fente ten zirlaite fuihna leh chawh phûrna lam hawi zawngin thu an sawi a ni.

Fimkhur tur
Traffic SP C Lalthanmawia chuan thupek chhuahin, Aizawl Water Transmission Division-in nimin aṭang khan Lawipu kâwn aṭanga Maubawk, Biakmawia lo pêng inkar kawngpuiah Greater Aizawl Water Supply Scheme Phase-I pipe lian phûm ṭhat hna an thawh dawn avangin, kawngpuia lirthei khalhtute leh kea kalte fimkhur turin a chah a; hna thawktute tibuai lo thei ang bera kawngpui hmang turin a hriattir bawk.