KHAWTHLIR

State Transport Autho­rity chuan, inkharkhip laiin mihring phur lirthei ṭhenkhatte'n sorkar rate aia sangin chuan man an la ṭhin tih hriat a nih thu a tarlang a; sorkar thu loa chuan man tisangte chu dan angin permit tihtawp thlenga hrem theih a nih thu a puang. Lirthei chuan man pang­ngai aia sang la hriate chu district Transport pisaah emaw, enforcement duty-te hnenah emaw, phone number 2316080-ah hriattir turin an chah a ni.

UPC (NEI) ṭhalai pawl, Pentecostal Youth Department (PYD) Aizawl City Coordination Committee chuan AVBD leh blood bank ngenna angin nimin khan Aizawl Civil Hospital blood bank-ah thisen unit 94 an pe a, petute mipa 81 leh hmeichhia 13 an ni. Individual donor panga an awm bawk. Thingfal Pastor Bial ṬKP pawhin Lawngtlai District Hospital-ah thisen unit 43 an pe a, a petute mipa 29 leh hmeichhia 14 an ni.

Disaster Management & Rehabilitation (DMR) secretary Lalbiaksangi chuan nimin khan thu­chhuah siamin, Home department-in phalna a bika a pekte tan lo chuan Mizorama luh khap a nih thu leh, phalna nei loa luh tumte chu ramrî-ah dan an nih dawn thu a tarlang. Mipuite chu zin veivâk lo turin a ngen nghal bawk.

Food, Civil Supplies & Consumer Affairs director Dr Lalhriatzuali Ralte chuan, Aizawl khawpuia petrol pump/filling station zawng zawngte chu Indian Oil Corporation-in hawn hun chhung pang­ngai a ruahman anga hawn theih a nih tawh thu a tarlang.

Indian Oil Corportion-in corporate social responsibility (CSR) hmanga Rs. 14,00,000 sénga ambulance an lei chu nimin khan Kolasib district-a hman turin Kolasib DC Dr H Lalthlangliana hnenah an hlan. Ambulance hi TATA Winger deluxe high roof van a ni a, damlo mut theihna khum, ṭhutna, oxygen dahna, kâng ṭhelhna, air conditioner, siren leh public address system-te a awm a ni.