Champhai dist-a hri venna kalpui dan sawiho

Champhai District Task Force on Covid-19 chu nimin khan DC conference hall-ah Covid-19 Medical Operational Team chairman Dr ZR Thiamsanga, Health & Family Welfare Board vice chairman ni bawk hoin an ṭhu-khawm a; Champhai district-a hripui vènnaa hmalakna hrang hrangte leh ei leh bara intodelh theih dan turte an sawiho.

Dr ZR Thiamsanga chuan, hripui a reh huna ei leh bar kawnga harsatna thleng thei turte ngaihtuah lâwk leh hmalak a ngaih thu a sawi a; hripui chu thil thar a nih avangin zir chian mek zel a nih thu sawiin, "Mizoram dinhmun ṭha rih mah se, fimkhur tluk a awm lo. Kan fimkhur lehzual a ngai a, state páwn aṭanga rawn hawte pawh ramriah Rapid Test Kid hmanga Rapid Antibody Testing tih vek hnuah quarantine centre-ah khung hran zel an ni," a ti.

Sorkarin ramri vengtute hriselna a ngai pawimawh tih sawiin Dr Thiamsanga chuan, "Thosi lèn 2,000 ramri vengtute hman tur sorkarin a lei a, qua­rantine centre-a awmte mamawh leh hriselnate pawh ngaihven reng a ni," a ti a; Champhai district mipuite chu hripui léng do kawngah sorkar hmalakna ṭawiawm zel turin a sáwm a ni.

Champhai DC mawhphurhna la mektu Mark Lalthanliana chuan, Champhai district-ah quarantine centre pathum a awm a, mi 34 khung hran mek an nih thu a sawi.

Champhai DAO George Lalthanngura tarlan danin, district-a chhungkaw 1,479 chu chul rît turin an ti a, buh chauh ni lo, chawa rin theih thlai dang­te chíng uar turin an inzirtir. Vaimim chi quintal 50 chuang an sem tawh bawk.