Maxicab-te'n chuan man an tisang
Inkhârkhip thawh thumna aṭangin mihring phur lirthei (commercial passenger vehicle)-te tlân phalsak an nih hnuah, Kolasib district chhunga maxicab tlân ṭhenkhatin chuan man (fare) an tisang nia sawi a awm avangin Kolasib-a Transport department hotute chuan nimin aṭang khan maxicab tlânte an endik.
Kolasib aṭanga thu dawn danin, inkhârkhip lai a nih avangin Mizoram sorkarin khualzin phur lirtheite chu mihring an phurh theih zat (seat capacity) zatve aia tam phur lo tura tih an ni a, hei vang hian khaw ṭhenkhata tlan maxicab-te chuan chuan man an tisang nia sawi a ni. Hei vang hian Kolasib District Transport Officer (DTO) chuan maxicab-te chu chuan man a pangngai anga la turin a hriattir a; nimin zing aṭang khan Transport enforcement-te duty-in maxicab an enfiah nghal a ni.
Kolasib-a chanchinbu pakhat, Kolasib Aw chuan, Kolasib district-a maxicab service zingah Aizawl khawpuia tlân zawng zawngin anmahni thuin chuan man an tisang vek a, passenger 50% chauh an phurh theih avangin chuan man pangngai ang chuan hlâwkna an nei lo a, mipui tana rawngbáwl an nihnaah an tlan hrâm hrâm niin an insawi tih a tarlang.
Thu dawn danin, Kolasib DTO H Lalhmingliana chuan maxicab chuan man chu rate pangngai anga la turin Kolasib-a maxicab drivers welfare president leh counter agent-te a hriattir tawh a ni.
Hetih lai hian, Aizawl district leh district dangahte pawh maxicab chuan man hi rate pangngai aia sang an la hlawm nia thu dawn a ni. Aizawl DTO chuan Vanglaini zawhna chhangin, Aizawl district-ah chuan maxicab fare tihsan vanga zualkona thu dawn an la nei lo tih a sawi.