Kuminah chhungkaw 60,000 hnenah Rs 50,000 pek vek kan tum - Zoramthanga

MNF president Zoramthanga chuan, kumin chhungin SEDP ṭanpuina chhungkaw 60,000 hnenah Rs 50,000 pek vek an tum thu leh, kum 2023-a Assembly inthlanpuiah MNF-in a tlem berah MLA 30 neih an tum thu a sawi.

Chief minister Zoram­thanga hian nimin khan Saitual Audi­torium-a MNF Ṭawi East Block Confe­rence a hmanpuinaah thu sawiin, kum 2023-a inthlanpui neih tur chungchang a sawi a, "MLA 30 hi a tlem berah neih kan tum a, ZPM hian under 10 an neih ka ring a, Congress hian pahnih/ khat an neih loh chuan an artelukàwn ang," a ti.

MNF varparh arsi a eng zual zel nia sawiin Zoramthanga chuan, "Kan MLA-te hi a mal buk buk chuan a tling tawh lo ang kan ti ṭhin. Congress-in tu nge an candidate dawn, ZPM-in tu nge an candidate dawn tih ngaihtuah tur a ni. MNF chuan bial tinah kum khat a la awm chhung hian a enkawltu tur dah vek kan tum," a ti a; candidate tur la puang lo mah se, MLA an neih lohna bial 12-ah pawh enkawltu/ hotu tur ruat vek an tum thu a sawi.

MNF President chuan SEDP chungchang sawiin, "Kumin chhung hian chhungkaw 60,000 hnenah Rs 50,000 pek vek kan tum a ni," a ti.

Zoramthanga chuan, ZPM hotute'n kum 36-40 kal ta vel aṭangin politics an buaipui ṭan tawh nia sawiin, "A khát tâwkin kalphung thar an nei a, kalphung thar nei zing lutuk hi khawiah mah an sorkar ngai lo," a ti a; ZPM hruaitute chu pawl sawn zing leh tui anga nghet lo an nih thu a sawi.

Chief minister Zoramthanga chuan, kum 2021-22 chhungin sorkar laipui aṭanga Mizoramin sum a hmuh tur a hmuh phak loh thu sawiin, "Kum 2021-22 chhung khan cheng vbc. 2,600 - 2,700 vel kan hloh a, tax kan lâk ve tur Covid vanga kan lâk loh hi cheng vbc. 3,000 vel niin ka hria. Kan harsa em em a, heti chung hian sorkar hnathawkte hlawh kan la pe thei a, 'Damlo na tak, kal thei ṭâwk ṭâwk, tiang hawl chung talin kal rawh,' min tihna ang vel a ni," a ti.

Zoramthanga chuan, Saitual DC office thar chu tun sorkar term chhunga hawn hman tum a nih thu leh an hawn hman loh deuh pawhin term tharah hawn a nih tur thu a sawi bawk.

Inkhawmah hian bialtu MLA minister R Lalzirliana leh Aizawl mayor Lalrinenga Sailo pawhin thu an sawi a; Zoramthanga'n MNF-ah voter 277 a lawm lut niin MNF thuchhuah chuan a tarlang.