No Vehicles Day-in zawm a hlawh

Aizawl - Thenzawl - Lunglei (ATL) kawngpui chhe lutuk siam­ṭhat thuai phûtna atana YMA Sub-Headquarters, Lunglei-in nimina Lunglei district puma lirthei tlan loh ní, No Vehicles Day an puan chuan zawm a hlawh.

ATL kawng, PWD Lunglei Road Division-in a enkawl chin a chhiat lutuk vanga Mizoram sorkara an ngenna hrang hrang a hlawhtlin loh hnuah Lunglei YMA Sub-Hqrs chuan nimin khan Lunglei district pumpuiah No Vehicles Day an puang a; Lunglei khawpui chhung leh district chhung khaw lian zualah zawm a hlawh ṭha hle nia thu dawn a ni.

YMA-in ruahmanna a siam angin, Lunglei khawpuia veng 12-ah chuan nimin zing dar 6 aṭang khan YMA branch hruaitute'n an veng ṭheuhah duty dahin, a bika tlân phalsak ni lo lirthei tlân chhuak tur an veng a; mipuiin YMA hmalakna an thláwp ṭha hle.

Lunglei YMA Sub-Hqrs presi­dent Lalrotluanga chuan zawhna chhangin, "YMA chu committee-in a rêl ang zela hma la ṭhin a ni a, kan kal zel dan tur sawi lâwk theih a ni lo," a ti a; an thil duhah a mawh­phurtute’n an hmalakna an hriatsak a, an duhnate an tih­hlawhtlin ngei an rin thu a sawi.