Drugs Testing Lab. building hawng

Damdawi enfiahna leh zirchiana tur, State Drugs Testing Laboratory building thar chu nimin khan Health minister Dr R Lalthangliana'n Mizoram New Capital Complex (MINECO)-ah a hawng. Minister chuan, Zoram Medical College-a in sak mekte sak zawh a nih hunah khum 500 a awm thei dawn tih a sawi.

State Drugs Testing Laboratory hi centrally sponsored scheme 'Strengthening of Drugs Regulatory System' hnuaia hmuh cheng vbc. 480 hmanga sak a ni a; in sakna senso, laboratory bungrua leh khawl bakah, kum thum chhung thawktute rawihna tur a tel.

Laboratory-ah hian damdawi ṭha leh ṭha lo te, a lem leh a tak finfiah te, a him leh him loh te, ram dang aṭanga rawn lut damdawite hman ngam a nih leh nih loh enfiahna atante hman theih a ni dawn a; damdawi endik theih loh a nei lo tura ngaih a ni.

Health Minister chuan, laboratory chu Mizoram mipuiin ṭangkai taka an hman a beisei thu sawiin, "Covid-19 hripuiin Mizoram a tihbuai avangin Health department hnuaia post 734 hnawhkhah tur, sorkarin phalna a pek vek tawh chu a hlawhtling thei lo a, a pawi tak zet," a ti.

Hripui léng avangin State Referral Hospital (SRH)-ah khum dah belh a ni a, ICU-ah khum 50 dáwn leh ward dangah khum 400 vel a awm thu sawiin R Lalthangliana chuan, "In chung ber siam mek a ni a, peih a nih hunah khum 500 a kai dawn," a ti a; SRH leh Aizawl Civil Hospital-a oxygen plant-te chu tihlen a nih bakah, district tinah oxygen plant dah a nih thu a sawi.