Scholarship sum central-in a pek tawh ; Pek chhuah turin Finance-in a pawm
Post Matric Scholarships to Scheduled Tribes Students scheme hnuaia kum 2021-22 atana scholarship third instalment pek chhuahna turin Mizoram Scholarship Board (MSB) chuan nimin khan administrative approval leh expenditure sanction an hmu a, Treasury-ah bill thehlut thuai an tum.
Tarlan tawh angin, Ministry of Tribal Affairs chuan October 4, 2022 khan Mizoram tan tribal scholarship tur cheng nuai 2,590.31 a pe chhuak a; sum a pekte chu kum 2021-22 scholarship third instalment cheng nuai 794.84 leh kum 2022-23 scholarship-a central share (50%) nuai 1823.89 a ni.
Vanglaini palai zawhna chhangin MSB secretary Dr PL Ramliana chuan, October 17, Thawhṭanni khan Finance department-in MSB hnenah allocation a pek thu a sawi a, "Allocation min pek hnu hian Secretariat-a Higher & Technical Education (Administrative) department-in vawiin (October 18, 2022) chawhnu lam khan administrative approval leh expentiture sanction min pe. Lehkha kan hmuh tlai deuh avangin vawiin hian Treasury-ah bill kan thehluh hman ka ring lo," a ti.
Kum 2021-22 scholarship third instalment la dawng lo zirlai 5,756 an awm mek nia an chhinchhiah thu sawiin PL Ramliana chuan, "Treasury-a bill kan thehluh hunah Treasury-in IFMIS kaltlangin kan account-ah pawisa a credit ang a, MSB bank (HDFC bank)-a a hlâwma sum a luh hunah PFMS kaltlangin zirlaite bank account-ah thun a ni ang," a ti a; zirlaite'n scholarship an dawnna turah harsatna an tawh loh nan an bank account an update ṭhat a pawimawh thu a sawi.
Dr PL Ramliana sawi danin, kum 2022-23 scholarship atan sorkar laipuiin central share (50%) cheng nuai 1823.89 pe tawh mah se, zirlaite dilna la endik mek a nih bakah, dilna hun an la hawng mek a ni. Sorkar laipuiin 25% dang a pek leh hnu, 75% a tlin hunah sem theih a ni dawn a, 75% an dawn tawh an sem zo tih fiahna lehkha central-a an thawn hnuah 25% dang central-in a rawn pe leh ang.
Scholarship an dawn lawk loh avangin RIPANS, Zoram Medical College, Industrial Training Institute leh Aizawl District Institute of Education and Training (DIET)-a zirlai hruaitute chuan October 4, 2022 khan Finance commissioner Vanlalchhuanga a pisaah an hmu a, scholarship sum pe chhuak thuai turin an ngen a ni.