Assam wanted Musa-in Mizoramah vote a nei 'Kan sorkarah hian smuggler-te an zalen' - TBC Lalvenchhunga

ZPM PAC member TBC Lalvenchhunga chuan, Mizoram sorkar hnuaiah dan phal loh thil tawlh ru ṭhin (smuggler)-te an zalen thu a sawi a, "Smuggler hotu­pa Musa Ahmed Siddiqui pawhin Sairangah vote a nei," a ti.

TBC Lalvenchhunga hian nimin khan Aizawl Press Club-ah thuthar thehdarhtute a kâwm a; Mizoramah dan loa thil tite an zalen ta hlea a lan thu sawiin, "Sual zalenna ram, smuggler-te paradis-ah kan ram a chang a ni ta ber mai. Mawhphurtu chu sorkar a ni," a ti a; Mizoram sorkarah smuggler-te an zalên a, dikna a chêp tawh nia a lan thu a sawi.

October 15, 2022 khan Assam police-te'n kum khat chuang an zawn tawh smuggler zinga hotupa Abud Majumdar pú nia sawi Musa Ahmed chu an man thu sawiin Lalvenchhunga chuan, "Musa Ahmed hi Mizorama ruling MLA pakhat nen an inhnim hnaih thu TV kaltlangin Ruatfela Nu chuan a sawi tawh. Musa hian Sairangah vote a nei a ni," a ti.

TBC Lalvenchhunga sawi danin, Musa Ahmed hi smuggling thilah Abub Majumdar aia thleng sang a ni a, Mizoram minister challang tak fanu nen pawh an inhnîm hnai hlea sawi a ni.

Assam sorkarin smuggling vanga an man, bail-a chhuak mek Abub Majumdar chuan tun hnaiah Supply Minister inah chaw a ei thu sawiin TBC-a chuan, "Abub hi District Fast Tract Court lungphûmna, Kolasib-a neihah a tel," a ti a; hengte avang hian MNF hruai sorkarah smuggler-te an zalen zia a chian thu a sawi.

TBC Lalvenchhunga chuan, Chief Minister-in kumina Anthu­rium Festival-ah Zoram malsawm­na hai chhuah a nih theih nan ṭawiawm turin mipui a sáwm tih sawiin, "Hetih lai hian, smuggler-te a thawhpui tlat nia a lan avang leh a hum tlat nia a lan avangin thil ti theiah a ṭhuttir tawh a ni ber," a ti.

Mizoram tihmingchhetute leh ṭhalai tam tak nun laksaktu smuggler-te chhuinaah sorkar ṭuan a fûm hlea a lan thu sawiin Lalvenchhunga chuan, "Kan police ṭha tak takte kut hi phuarin a awm ta mai em ni," tiin, Mizoram sorkar a zawt.

TBC Lalvenchhunga chuan, ZPM party-in Mizo ram leh hnam a din chhuah theihna turin theihtawp an chhuah zel tur thu a sawi a, "Kan ram leh hnam himna tiderthâwng thei thil chu eng thil pawh ni se kan dodal zel dawn," a ti.

Musa Ahmed
■ Silchar Airport-a man Musa Ahmed hi smuggler hotupa a ni
■ Sairang-III polling station-ah vote a nei, a voter ID chu
GDP 0094425
■ State ṭhenawmte'n man an tum hi zalen takin kan lo kawl
■ Minister challang tak fanu nen an inhnim hnai hle niin an sawi

Abub Mazumdar
■ Sorkar thar lawmna Raj Bhawan-ah leh CM Bungalow-ah a tel
■ A nupui neihnaah Chief Minister nupui a tel
■ CM pahnih inbiaknaah official delegation zingah a ṭhu ve
■ Bail-a chhuah a nih laiin Supply Minister inah tukṭhuan a ei