Ruihhlo ngai enkawl dan sawiho

Mizoram University chuan nimin khan Mizoram Police Headquarters-a Arya Mess-ah ruihhlo ngaite enkawlnaa hma latu pawlte pualin ruihhlo ngai enkawl damte enkawl chhunzawm dan tur chungchanga inràwnkhawmna an buatsaih a, Home minister Lalchamliana'n a hmanpui.

Inrâwnkhawmnaah hian kal khawmte chuan ruihhlo ngaite enkawlna hmun aṭanga an chhuah hnua ruihhlo an bànsan hlen theih nan hmalakho ṭha an ti a; Collaboration structured strategy for aftercare duan ni se, zau zawka inràwnkhawm leh thuai ni se, an ti.

He hunah hian Health & Family Welfare, Social Welfare & Tribal Affairs leh Excise & Narcotics department leh Police hotu te, Mizoram Synod, Central YMA, Synod Hospital leh Mizoram Journalists Association hruaitu te, ruihhlo ngaite enkawlna hmuna thawkte an tel a ni.

Minister Lalchamliana chuan, Mizoramin Myanmar leh Bangladesh nen ramri thui tak an inṭâwm thu sawiin, "Mizoram hian khawvel huapa hriat lâr ruihhlo siamna leh tawlhna hmunpui Golden Triangle an tih a hnaih em em a, hei vang hian ruihhlo hi kan hlat ngai lo," a ti.

Sorkar, kohhran leh tlawmngai pawlte an ṭangho chung pawhin ruihhlo do rêm a harsa tih sawiin Lalchamliana chuan, "Ruihhlo man zinga a lian tham deuh chu Mizoram páwna hralh tur niin a lang. Chutihrualin, tualchhunga hralh tur che vel nia lang ringawt pawh hi kan state-a mihring cheng zat nen chhût chuan a tam tham hle a ni," a ti a; ruihhlo donaah thawh nasat zual zel a ngai thu a sawi.