Thluaka sum lut vei lo turin mipui ngen

ZPM working president K Sapdanga chuan nimin khan Reiek community hall-a ZPM Dampa East Block political training-ah thu sawiin, thluaka sum lut vei ve lo turin Mizoram hmun hrang hranga mipui a ngen.

K Sapdanga chuan, tun hnaia ṭawngkam lâr, thluaka sum lut tih chu kohhran platform aṭangin an hria tih sawiin, "Mipuite thluakah sum a lut ve ang tih a hlauhawm. Thluaka sum lut vei ve lo turin tlang hrang hranga mipuite kan inngen nawn a ni. Inthlan huna candidate kan mitthla danah, a ipte puar thei deuh intinzâwnna a awm thei em tih ngaihtuah a ngai. Chutianga a nih chuan he ram hian MLA atan ram veitu leh kaihhruai dan hria ni loin, mi hausa kan zawng ang," a ti.

Mi hausate'n pawisa khelhna ang chauha ngaia politics an khel tur duh loin an kal khawm tih sawiin Sapdanga chuan, "Hei hi ZPM pian chhan a ni," a ti a; Val Upa Council chungchang sawiin, "VUC hi ṭhat loh theih lohna báwm a ni a, kan thla an timuang em em. Sorkarin Kamrula te ang hi lo khawi ve ta se, VUC chuan a phal tawp lo ang," tiin a sawi.

ZPM Working President chuan, corruption inṭanna chu politics a ni tih a chian thu sawiin, "Sorkar hnathawk tu emaw chu a lo dik lo mai thei, mahse, politics hi a bul ber a ni," a ti a; ZPM thil tum pakhatnaah 'Ram rorelnaa Pathian ram tun din' tih a awm thu a sawi bawk.