Governor leh BSF IGP inkâwm

Governor Hari Babu Kambhampati chu nimin khan Raj Bhavan-ah Mizoram leh Cachar awptu Border Security Force (BSF) IGP Binay Kumar Jha nen an inkâwm a, Mizorama BSF-te hnathawh an sawi dun.

Hari Babu Kambhampati chuan, Mizoram chhim lam leh khawthlang lamah BSF-in ramri an véng ṭhaa a hriat thu sawiin, "BSF hna pawimawh ber ramri venhim hna ṭha taka an thawh bakah, an inkulhna hmuna tualchhung mite tihhmasawn leh ṭanpui kawngah an thawk ṭha hle. 131 Bn BSF-te'n mi ṭanpui leh chhawmdawl kawngah an commandant KS Nautiyal hoin hna an thawk ṭha tak zet a ni," a ti.

Governor hian 131 Bn BSF-in hna an thawh ṭhat lawmpuina leh hriatpuina atan BSF IGP hnenah Letter of Appreciation a hlan a ni.

IGP Binay Kumar Jha chuan, BSF hnathawh pawimawh ber chu India ramri venhim a nih thu a sawi a; an awmna bula khawtual mite nena inlaichìnna ṭha tak an neih thu leh ṭhalaite hnenah sipaia ṭan pawimawhna leh hamṭhatnate an zirtir ṭhin thu a sawi bawk.