Kan sorkar leh ngei ka ring - Lalruatkima

Aizawl West I MNF Block-in Sairang Zero Point-a MNF Diamond Jubilee lungphun an buatsaih chu hawn a ni a, a hawngtu MNF adviser Lalruatkima, minister of state chuan kum 2023 inthlan hunah an sorkar leh ngei a rin thu a sawi.

Lalruatkima chuan kum 2023 inthlanpuiah Pathian leh mipui zarah MNF an sorkar leh ngei a rin thu sawiin, "Chief Minister ram vei mi, vision nei ṭha, a taka thawk ṭhin kan nei. Mumal taka MNF kan kal laiin opposition party-te an chiri hle. Congress party-te India ram hmun ril lamah awmzia an awm tawh lo a, Mizoramah lah nise hmanni maia mipuite hnawl hnu kha an ni. Congress hi sorkar turin mipui rin an la hlawh lo tih a chiang," a ti.

ZPM chungchang sawiin MNF Adviser chuan, "An party kalphung pawh a mumal lo hle. An president Pu Lalliansawta'n 'kan sorkar chuan Pu Lalduhoma a CM ang' a tia. Amah Pu Duhoma ve thung chuan, 'kan sorkar chuan CM tur chu Val Upa Council-in a rel ang' a ti lawi si," a ti a, ZPM thu leh an chezia leh ui bengah hlin tur a awm loh thu a sawi.