Hma lam panin BJP a kal zel - MBJP President

Mizoram BJP hruaitute chuan October 17, 2022 zan khan Aibawk khuaah he khua-a BJP member-te nen hun an hmang a, an president Vanlalhmuaka chuan BJP chu hmalam panin a kal zel niin a sawi.

Vanlalhmuaka chuan BJP chu kalphung fel tak nei an nih thu sawiin, "Mizorama party ṭhenkhat anga mipui hma a thutiam zut a, ti leh lo party ang kan ni ve lo. Tun hunah hian central aṭanga India ram miretheite tan scheme ṭha tinreng kan nei a, Mizorama sorkarna chelh mekte hian a nih tur anga hma an lak ṭhat loh avangin mirethei tam takin an dawng thei lo ṭhin hi a pawi hle a ni," a ti.

Politician tam zawkte chu ṭawngka maia miretheite hmangaihtu nia sawiin MBJP President chuan, "India sorkarin miretheite tana heti khawpa ṭha scheme a duante Mizoramah a nihna anga kan dawn loh chhan chu, mirethei account-ah direct a sum aluh zel tawh avangin sorkarin hlawkna an neive tawh loa, mimal pocket-a lut thei a awm tawh loh avangin, miretheite tan engmah an ti ṭha duh ta lo," a ti a, miretheite an retheih tulh tulh thu a sawi.

Vanlalhmuaka chuan BJP leh Kristianna chungchangah dawt hmanga dik lo taka puhna a awm ṭhin tih sawiin, "Hei hi Mizoram a thusawitu tam takte'n BJP chu Kristiante tana ṭha lo anga an sawi fo hi a letling thawk a ni tih hi kan hriat a ngai a ni. Pi Sonia Ghandhi-te hi Roman Catholic a nih laiin Congress president-ah an dah duh lo a, nimahsela Hindu-ah a inleh veleh president-ah an dah chauh a ni," a ti.