Bhavya au eih hmasa turin MLA phût

Lunglei District Congress Committee (LDCC) chuan thuchhuah siamin, Lunglei North bialtu MLA Dr Vanlalṭanpuia chu Aizawl-Lunglei kawngpui chhiat chhanah Mizo engineer-te mawhpuh hmasa lo a, Bhavya company au eih hmasa phawt turin an phût.

LDCC chuan, kawng chhe lutuk vanga YMA ṭhahnemngaihna a lan chhuah tâk avanga insawi mawiah MLA Dr Vanlalṭanpuia an puh a, "Bhavya company lakah eng vanga huaisen taka aw chhuah thei lo nge an nih? Bhavya company au eih thei lo ruling MLA hian hmai phih fai nan sorkar hnathawk engineer-te a mawhpuh daih niin a ngaih theih," an ti.

Dr Vanlalṭanpuia'n Lungleia Mizo Hnam Runa thu a sawiah, Lunglei khawpui chhung kawng siamna tur cheng nuai 590 MNF sorkarin a dah tawh anga a sawi leh Lunglei by-pass road hna bul ṭanna tur cheng vbc. 10 Congress sorkarin a dah tawh engmahlo anga a sawi chu zah theih loh thlak an tih thu leh Lunglei mipui hmuhsitnaa an ngaih thu an tarlang.

Lunglei khawpui kawng siamṭha turin sorkarin contractor a thlang tawh a, work order pawh a pe ngei a, mahse, kawng siamna tur sum a awm loh avangin sorkar laipuiah special assistance a dil mek chauh tih sawiin LDCC chuan, "Contractor hi ama sum hmanga lo thawk mai tura tih a ni tih hi Dr Ṭanpuia hian a hre pha ve lo nge, hre reng chungin Lunglei mipui bum nan dâwt a sawi? Kawng chhe lutuk siamna tur cheng nuai 590 MNF sorkarin a dah a nih tak zet chuan Mizo contractor thlan tawh hnenah sum pe thuai turin kan ngen a ni," an ti.

LDCC chuan, Lunglei by-pass road hna bul ṭanna tur cheng vbc. 10 awmna sawi chiang turin MNF sorkar an phût a; Khawiva kawng siam tura tih chu tender chhuah dan leh sum dinhmun sawi chiang turin an phût bawk.