Sorkar kalphung ṭha tih loh avangin MLA ṭhenkhatin CM Relief Fund-a Sum thawh belh an tum tawh lo
Mizoram sorkarin sum a enkawl dan leh a hman dan kalphung ṭha an tih loh vangin MLA zingah an hlawh leh MLA fund Chief Ministers' Relief Fund-a thawh tum tawh lo an awm. Hetih lai hian, BJP tih loh chu party anga thutlukna siam an la awm lo.
Vanglaini palai zawhna chhangin ZPM Legislature Party secretary Dr Vanlalthlana chuan, Covid-19 dona atan MLA fund leh an hlawh CM Relief Fund-a thawh chungchang an la ngaihtuah nawn loh thu a sawi a, "Kan Leader a damloh avangin damdawi-inah a awm a, a chhuah hunah kan la rél ang. Keima mimal chuan ka MLA fund leh hlawh thawh ka tum tawh lo," a ti.
Dr Vanlalthlana chuan, a MLA fund leh hlawh thawh a tum tawh loh chhan sawiin, "Kan Chief Minister hian a duh duhin sum a enkawl a, mi dang pawh a ráwn duh lo. Sum tihdanglam theih tawh lohte a ti a, an sorkar hlimin NEDP sum hmanga mi hnena contract pek tawh sate pawh cancel-in a dangah an hmang leh thei tho a ni," a ti a; CM sum enkawl dan chu lungawithlak loh a tih thu a sawi.
Supplementary Demand sum chungchanga CM Zoramthanga thu sawi a dik loh thu sawiin Dr Vanlalthlana chuan, "Kan zir chiang a, kan CM sawi ang kha a ni lo nasa. Miin sum an thawh chur chur lai leh sorkarin sum dinhmun a harsat thu an sawi laia an duhsak zawngte hna an inpe reng hi ṭha ka ti lo," a ti.
Vanglaini palai zawhna chhangin BJP MLA Dr Buddha Dhan Chakma chuan, quarantine centre-a awmte'n anmahniin awm man leh ei leh in mante an intum dawn tâk avangin a MLA fund leh hlawh sorkara thawh kher an party-in ṭul an tih tawh loh thu a sawi a, "MLA fund cheng nuai 50 thawh leh kan hlawh December thleng 30% thawh kan rèl lai khan quarantine centre-a awmte mahni intumtir tur hi an sawi lo," a ti a; quarantine centre-a awmte senso sorkarin a tumsak leh dawn chuan a hlawh a thawh leh tur thu a sawi.
Dr BD Chakma chuan, a MLA fund pawh a la thawh loh thu sawiin, "Sorkar kalphung ka ngaichâng reng a, an kalphung azira thawh mai theih turin ka ruahman reng. Quarantine centre-a awmte an intumtir tawh ber chuan, sum hmanna vak a awm tawh lo a, thawh a ngai tawh lo-ah kan party chuan kan ngai," a ti.
Sorkar kalphung mak a tih thu sawiin BD Chakma chuan, "Sorkar hnathawk hlawh an batsak lai leh miin sum an thawh chur chur laiin, an party mite hna an inpe reng tho a ni," a ti a, sorkar thil tih dan chu dik lo a tih thu a sawi.
Congress Legislature Party leader Zodintluanga chuan, hlawh thawh chhunzawm zel chungchang an la sawiho lo tih sawiin, "CLP-in kan la sawiho loh avangin sawi theih ka nei rih lo. Chu bakah, keini chuan MLA fund nuai 50 thawh leh December thleng hlawh thawh tura inti zingah khan kan tel ve lo," a ti.
Tarlan tawh ṭhin angin, MNF, ZPM leh BJP MLA-te chuan Covid-19 dona atan MLA fund cheng nuai 50 ṭheuh leh an hlawhpui (basic pay) aṭanga 30% chu December thleng thawh an lo rêl tawh. An inhmuhkhawmnaah Congress MLA-te an tel ve loa, mahse an thla khat hlawh (basic pay) chu Covid-19 dona atan CM Relief Fund-ah an chhûng lut tawh a ni.