District 6-ah hripui vei an awm lo

October 17, Thawhṭanni khan Mizoramah swab sample 316 endik aṭangin Covid-19 vei mi 14 hmuh chhuah a ni a, positivity rate 4.43% a ni. Mizorama district 11 zinga parukah Covid-19 positive an awm rih lo.

Nimin khan hripui vei dam tawh mi 21 chhuahtir an ni a, hripui vanga thi an awm lo. Nimin tlai khan Covid-19 positive mi 43 an awm mek a, an tlem tial tial.

Thawhṭannia Covid-19 positive hmuh chhuahte chu - Aizawl district-ah mi pasarih, Lunglei district-ah pathum leh, Saitual leh Khawzawl district-ah pahnih ve ve an ni.

IDSP aṭanga thu dawn danin, Mizoramah swab sample 19,86,302 endik tawh niin, Covid-19 vei 2,38,694 hmuh chhuah a ni tawh a, 12.02% a ni. Nimin tlai dar 4 thlengin mi 2,37,928 (99.68%) chhuahtir an ni tawh a, mi 723 (0.30%) thi tawhin, enkawl mek mi 43 (0.02%) an awm.

Mizorama district 11 zinga district paruk - Siaha, Champhai, Kolasib, Serchhip, Lawngtlai leh Hnahthial district-ah Covid-19 vei an awm tawh rih lo a; positive mek mi 10 aia tam awmna Aizawl district chiah a awm rih a ni.