KHAWTHLIR

PUC-in thisen pe
Pachhunga University College chuan nimin khan an college campus-ah thisen pek an huaihawt a, Civil Hospital, Aizawl tan thisen unit 110 an pe a, petute mipa 101 leh hmeichhia pakua niin, Science third semester leh post graduate zirlaite leh research scholar-te an ni. PUC NSS hian kumin September thla chhung khan blood donation camp ṭum nga an huaihawtah thisen unit 421 an pe tawh bawk.

CM-in enfiah
Chief minister Zoramthanga chuan nimin khan Saitual DC pisa tur sak mek a hmunah a enfiah. In hi kum 2021-ah sak ṭan niin, chhawng lia sak tur a ni a, a zau zawng sq.m. 585.64 a ni. CM hi bialtu MLA R Lalzirliana, minister-in a ṭawiawm a, Saituala hmasawnna dinna tur hmun remchang an enfiah nghal bawk.

Minister-in hmanpui
All Nagaland College Students Union chuan nimin khan Dimapur-a Sakus Mission College-ah Collegiate Meet, 2022 an hmang a, minister of state robert Romawia Royte-in a hmanpui. Minister chuan, Mizoram sorkarin term kal lai kum nga chhungin phûl lem phah football khelmual 30 siam zo hman tura ṭan a lak thu leh infiamna tur hmasawnna ruhrel dang tam tak din thar a nih thu a sawi.

Aizawl-Lunglei bus
Lunglei District Transport Officer (DTO) chuan, kawng chhiat avangin Aizawl-Lunglei MST bus tlân dan October 17, Thawhṭanni aṭangin tihdanglam a nih thu a tarlang. Aizawl aṭangin Thawhṭanni, Nilaini leh Zirtawpniah Lunglei leh, Lunglei aṭangin Thawhlehni, Ningani leh Inrinniah Aizawl pan ṭhin a ni ang.

PS siam belh rél
Aizawl District Standing Committe on Rationalisation of Polling Stations chu nimin khan an chairman Dr Lalhriatzuali Ralte, district election officer kaihhruaiin Aizawl SP conference hall-ah an ṭhukhawm a, polling station (PS) siam belh dan tur an sawiho. Aizawl district-ah PS 305 a awm mek a, PS thar 15 siam belh tura rel a ni.