Council of Ministers meeting neih a ni ; 7th. Pay zir chiangtu tur din an rel

Nimin khan Council of Ministers meeting chu Chief Secretary conference hall-ah neih a ni a; sorkar laipuiin 7th. Pay a kalpui tawh avangin, Mizoram sorkar hnathawkte 7th. Pay anga hlawh pek ve a thuphungin ṭha an ti. Mizoram sorkar hnathawkte 7th. Pay anga hlawh pek chungchang zir chiangtu tur committee din an rel.

Chief minister Lal Thanhawla hoa Council of Ministers meeting-ah hian, Mizoram sorkar hnathawkte'n 7th. Pay anga hlawh an lak theih nanuluk taka ngaihtuah ṭha an ti a, "A zir chiang tur committee din ni se, chutah chuan sorkar hnathawk ni lo pawh member-ah telh ni se, an ti.

Vanglaini palai zawhna chhangin Finance department hotute chuan, 7th. Pay anga Mizoram sorkar hnathawkte hlawh tihpun a nih chuan, kum tin cheng vbc. 563 sen belh a nih tur thu an sawi. Chief secretary Lalmalsawma chuan, tun dinhmunah sorkar hnathawk hlawh atan thla tin budget aṭangin 36-37% sên ṭhin a nih thu a sawi bawk.

Finance department hotute sawi danin, Mizoram sorkar hnuaiah tunah hian sorkar hnathawk a nghet 42,457 an awm a, chu'ngte tan chuan budget aṭangin sum thla tin 36-37% sên a ni. 36-37% tih hian district council hnuaia thawk te, deficit school zirtirtute leh a nghet loa thawkte a huam lo.

Tun dinhmunah 7th. Pay hi state zawng zawngin an la hmang lo a; hmarchhak state zingah Assam leh Tripura ten an hmang tawh a, a bak state dangte pawhin an zir chiang mek nia thu dawn a ni.

He thu ziah laia Council of Ministers meeting-in agenda an pawm tawhte chu - The Mizoram Forest Service (Amendment) Rules, 2017; The draft Mizoram Engineering Service (Amendment) Rules, 2016; Encadrement of 1 post of medical Officer (Palliative Care Clinic) under Civil Hospital, Aizawl to Grade-III of MGDO Sub-Cadre under Mizoram Health Service in the Mizoram Health Service Rules, 2009 as amended; Double increment of high school headmasters and changes in the residency period thereoffor Selection Grade teachers of high school on their promotion to headmaster under School Education department te a ni.

'Double increment of high school headmasters and changes in the residency period thereoffor Selection Grade teachers of high school on their promotion to headmaster under School Education department' chungchangah hian 'Kum 2012-2016 inkarah M/S headmaster-te'n double increment an lak laiin, H/S headmaster-te'n an dawn ve loh chu M/S headmaster-te hmuh ṭhin anga pek ve ni rawh se,' an ti.

Meeting-ah hian agenda 22 a awm a, he thu ziah lai thleng hian agenda tam zawk an la ngaihtuah hman lo.