Bungrua dah khâwl dan tur sawiho a ni
Mamit DC Dr Lalrozama chuan nimin khan Mizoram sorkarin entry point (state dang aṭanga luhna) atana a thlan Kanhmun khua a tlawh a, mipui ni tin mamawh dah khâwlna hmun tur leh enkawl dan turah YMA Mamit Sub-Hqrs. Taitesena Group, Langkaih Group, Hachhek Joint VC Association leh Kanhmun khua khawtlang hruaitute leh tlawmngai pawl aiawhte nen an inkâwm.
Dr Lalrozama chuan, Covid-19 donaah mi tinte'n thâ thlah loa hma an lak zel a ṭul thu sawiin, "Mizoram sorkarin a ruahman angin Vairengte, Bairabi leh Kanhmun khuate chu entry point atan hman a ni a, venhimna lama thawkte inpawh leh lungrual taka kan kal a ṭul dawn," a ti a; fimkhur tak chunga ei leh bara buai lo tura hmalak a pawimawh thu a sawi.
Inkawmnaah hian state páwn aṭanga lak luh bungruate him leh hrisel taka mipui hnena a thlen theihna tura rawtnate sawiho a ni a; bungruate chu ni thum chhung chawlhtir phawt ni se, a ṭul dan azirin damdawi hmanga kah thianghlim ni se, bungraw dah lailâwkna hmun tura ruahmante a ṭul anga hman ni se an ti. Covid-19 hrik chu darkar 72 aia rei bungruaah a dam theih loh thu medical hotute'n an sawi a ni.
Mamit DC hi Mamit SP Shashank Jaiswal, medical officer Lalmuanawma Jongte, Zawlnuam BDO Andy Lalfakzuala, ASO Victor Lalawmpuia leh khawtlang hruaitute'n an ṭawiawm.