Nurse 25 lakah kar thum chhunga Thutlukna siam turin sorkar hriattir

Mizoram sorkara staff nurse atana Mizo­ram Public Service Commission (MPSC)-in mi 25 lak (rawt) tawh, Council of Minister-in kaltlangpui loh tura thutlukna an siam khin letna chu Gauhati High Court, Aizawl Bench chuan a hnâwl a; state sorkar chu chawlhkar thum chhunga thutlukna siam turin a hriattir.

Staff nurse hna thawk tura MPSC-in mi 25 a lak (rawtna a siam) Mizoram sorkarin a hnâwl avang hian MPSC-in a recommend mi 25 zinga mi 16 chuan Mizoram sorkar chu Gauhati High Court-ah an khing a ni.

Court-ah tarlan a nih danin, Health depart­ment-a Under Secretary chuan April 21, 2016 khan MPSC chu State Referral Hospital, Fal­kawna thawk tur nurse 25 written exam tel loa la turin a hriattir a; MPSC chuan August 2, 2016 aṭanga September 2, 2016 chhungin nurse 25 lak tur atan interview an ko a, candidate 538 an awm. Mi 538 aṭangin MPSC chuan mi 25 a thlang chhuak a, an thlan chhuahte list chu September 2, 2016-ah notification tichhuakin an tarlang.

Staff nurse tura rawt mi 25 zinga 16-te ukil chuan, MPSC-in an thlan tawh mi 25-te pawm lo tura Council of Minister-in thutlukna an siam chhan chu MZP leh All Mizoram Contract Staff Nurse Association-te'n complaint an thehluh vang niin a tarlang a; an complaint-ah hian nurse 25-te thlan danah thil dik lo a awm tih tarlan a ni lo niin Court a hrilh.

Mi 16-te ukil chuan, September 21, 2016-a Council of Ministers ṭhukhawmin nurse 25 lak tharte pawm lo tura thutlukna an siam chung changah hian MPSC Chairman chuan a tih ngei ngei tur sawifiahna a siam loh thu a tarlang a ni.

Court chuan, Council of Minister thutlukna chu Governor hminga notification tihchhuah a nih hma chuan state sorkar thuah ngaih theih a nih loh thu a tarlang a, "Sorkarin hemi nurse lak let chungchangah hian order a la chhuah loh avangin writ petition thehluhna atan a la hma lutuk a, a hun hma a nih avangin hnâwl a ni," a ti.

High Court chuan, thutlukna hi October 20, 2017 khan a tichhuak a, thutlukna tihchhuah aṭanga thla thum chhungin thutlukna siam a, order tichhuak turin Mizoram sorkar a hriattir a ni.