Mamit dist. aṭangin oil palm chingtute Oil palm hralh theih loh vangin mangang

Mamit District Oil Palm Cooperative Society (MDOPCS) hruaitute chuan, kumin July thla aṭang khan an oil palm tharte an hralh thei lo a, Mamit district-a oil palm chíngtute an mangang tawh hle niin an sawi.

MDOPCS treasurer Rosangzuala chuan, Mamit district-a oil palm tharte chu Bukvannei, Kolasib district-a oil palm mill neitu Godraj Agrovet Ltd.-in an lei ṭhin thu sawiin, "Kan oil palm thar an leite chu kawng hla lam, Sairang lamah an phur ṭhin a, July 14, 2017 aṭang khan kawng chhia chhuanlamin kan oil palm tharte chu an lei tawh lo a ni," a ti.

Rosangzuala chuan, oil palm leite phurh man atan Mizoram sorkarin NEDP aṭangin Godrej Agrovet leh oil palm thartute chu kg. khatah Re. 1 ve ve a pek thu sawiin, "NEDP aṭanga oil palm phurh man pek a nih bakah, Mamit DC-in Bairabi Tlawng lei zawh phalna special permit a pe chungin Godrej Agrovet chuan kan oil palm-te an lei thei rih chuang lo," a ti a; Godrej Agrovet chu sorkarin a thunun thei tawh loa a lan thu leh, sorkarin nawr se, oil palm-te lei turin ti se an duh thu a sawi.

MDOPCS Treasurer sawi danin, oil palm-te lei tur hian Mizoram sorkar leh Godrej Agrovet chuan kum 2004-ah thuthlung (MoU) an ziak a ni. MoU hi Godrej Agrovet chuan a palzût nasa a, an tih ngei ngei tur MoU-a inziakte pawh an zawm lo nasa hle niin a sawi.

Rosangzuala sawi danin, oil palm chu a thar vanglai chuan chawlhkar khatah vawi khat tal lawh a ngai a, lawh a nih loh chuan a hmin chhe hman zel a ni. Godrej Agrovet-in an collection centre-ah oil palm chu kg. khat Rs. 5.50-in an lei ṭhin. Oil palm hi Mamit district-a khaw tin deuh thawa chhungkaw 1,000 chuangin an chíng a; Mamit district leh Kolasib district-a oil palm tharte lei turin Mizoram sorkar chuan Godrej Agrovet hi MoU a ziahpui a ni.