CM-in J Thankima College campus a hawng

Chief minister Lal Thanhawla chuan nimin khan Bawngkawn Brigade Vengah J Thankima College central campus a hawng a, J Thankima College silver jubilee lawmna a hmanpui nghal.

CM Lal Thanhawla chuan, J Thankima College-in kum 25 a tling ta chu a lawmpui thu sawiin, "Mihring kum nena tehkhin pawhin puitlin hun a nih tawh angin, pui­tlinzia a tilang tawh a, hlawhtlinna tam tak a nei tawh a ni a," ti a; hmunhma ṭha tak an neih chu cheibâwl thiam tur leh campus chhungah ngaw hmun nuam tak siam turin a chah.

Lal Thanhawla chuan, ṭhangthar lehkha­thiam chhuak zelte'n Mizoram dinhmun pawimawhna an hriat a, Asia chhimchhak lam ramte leh India insumdawn tawnna kawngpui la ni mai tur chungchangte pawh chiang taka an hriat a ngaih thu a sawi a, "An thiamnate lo tât hriam a, inpuahchah lâwk tur leh chhawr ṭangkai thei tura rilru puthmang leh sûtthlekte an her rem a ngai," a ti.

Sorkar hna chu innghahna tlak a ni dawn lo thuai dawn tih sawiin CM Hawla chuan, "Ṭhalai mithiam rualte'n mahni eizawnna insiam chawp, self-employment lam an hawi a ngai tawh a, sorkar pawhin self-employment huanga hma late chu NEDP hnuaia Entrepreneurship Development Scheme kaltlangin a thawhpui zel dawn," a ti a; ram hmasawn zel nan leh economy tihṭhat nan entrepreneur-te chu sorkar in­nghahna tur an nih thu a sawi.

Chief Minister chuan, sap ṭawng zah leh vai ṭawng hmuhsit chu Mizote ṭhanmawhbâwk a nih thu sawiin, "Ṭhangthar rual, Mizoram innghahnate chuan India rama pawimawh Hindi leh khawi hmun pawha pawimawh sap ṭawng thiam an tum a ngai. Sorkar hnathawk lian zingah a ziak thiam fu si, ram tana ṭawng a ngaih huna sap ṭawng emaw, vai ṭawng pawha insawifiah hlei thei lo an awm fo hi thil mawi lo a ni. Ziak leh chhiar thiam mai a tâwk lo a, chhawr tlak thiamna nei chunga degree neih a ngai tawh," a ti.

J Thankima College hi kum 1992-ah din a ni a, tunah hian zirtirtu 29 leh zirlai 593 an awm mek. Bawngkawn Brigade ram chhungah campus thar, square metre 8,519-a zau an nei a, NLCPR aṭanga hmuh cheng nuai 85.77 hmangin building eng emaw zat an sa tawh a ni.