SPMRM pualin Minister hoin hun hmang

Shyama Prasad Mukherjee Rural Mission (SPMRM) hnuaia eco-tourism leh Ministry of Tourism-in khualzin hîpna atana an hmalakna pakhat, Paryatan Parv pualin October 24, Thawhlehni khan Sateek community hall-ah hun hman a ni a; khuallian Rural Development minister R Lalzirliana'n Lian­phunga Bûng bulah cycling track siam tur lungphùm a phúm nghal.

RD Minister chuan, SPMRM chu thing­tlang khuate'n khawpuia chengte neih ang an neih theihna tura buatsaihna, intluktlanna atana hmalakna a nih thu a sawi a, "Mizoramah chuan thingtlanga cheng 90% vel an ni a; SPMRM hmangin thingtlanga chengte tan zirna in ṭha, tui, kawlphetha, kawng ṭha leh inhlawhna ngêl­nghet zawk an theihna tura hmalakna a ni," a ti.

Hmasawnna thleng tur­in mihring rilru buatsaih hmasak phawt a ngai tih chu mithiamte hmuh dan a nih thu sawiin R Lal­zirliana chuan, "Mihring rilruin hma a sawn ang zel­in pawn lam hmasawnna kalpui tur a ni," a ti a; mihring rilru buatsaih hmasa lo a, páwn lama hmalakna kal chakpui lutuk vangin mihring rilru a kal sual theih thu a sawi.

Minister chuan, SPMRM tihlawhtling tur chuan khaw mipuite'n an ṭangkaina leh mawhphurhna an hriat chian a ngaih thu sawiin, "Mizoram hi ziak leh chhiar t­hiam lamah kan sang hle a. Hemi dinhmun luah âwm renga kan awm a ngai. Kan thiamna hi ṭang­kai zawka hman dan kan zawn zel a pawimawh hle a ni," a ti.

SPMRM hi kum 2015-ah ṭan a ni a, Mizoramah chuan RD department-in an kalpui. India ram chhungah enchhinna atan cluster 300 thlan chhuah phawt a ni a, chu'ng zingah chuan Aibawk cluster a tel. Aibawk cluster hnuaiah hian khaw 11 - Melriat, Kelsih, Falkawn, Muallungthu, Tachhip, Sateek, Maubuang, Ṭhiak, Sumsuih, Aibawk leh Phulpuite a awm.

Paryatan Parv hi Ministry of Tourism hnuaia kalpui a ni a, India ram hmun hrang hrangah October 5-25, 2017 chhung­a neih tura ruahman a ni. Khualzinte hîpna atana hmalakna pakhat niin, hemi puala mipuite hnen­a inhrilhhriatna neih a ni a; lemziak leh essay hmangin intihsiakna neih a nih bakah, cycling track thar siam tur rua­hman a ni.

Cycling track hi Lianphunga Bûng bula awm tura ruahman niin, km. 2.5-a thui a ni a; Lianphunga Bung leh a chheh­vel chu chei tum niin, inthiarna, store-house leh ṭul dangte sak tum a ni.