CWC member-te tan training buatsaih

District hrang hranga Child Welfare Committee (CWC) member tharte puala ni thum awh tur training chu nimin khan Mizoram State Child Protection Society (MSCPS) training hall-ah ṭan a ni a, Social Welfare minister PC Lalthanliana'n a hmanpui. Training-ah hian 'The Juvenile Justice (Care & Protection of Children) Act, 2015' zirho a ni.

Social Welfare Minister chuan, CWC member tharte chu naupang chak lo leh áwm ném zawk, an chak loh vanga an aia chak leh thil ti thei zawkte'n kawng hrang hranga an ngaihthahna leh an dikna chanvo palzûtna laka venghim theitu nihna pawimawh tak chelhtu an nih thu a hrilh a; khawngaihna nena taima taka an hna hlen turin a chah.

Training-ah hian Child Welfare Committee tih tur leh mawhphurhna hrang hrang bakah ICPS chungchang zirho a ni. CWC hian a din tirh, kum 2012 aṭangin kumin September thla thleng khan naupang chanhai leh enkawl ngai bikte thubuai 6,537 chuang an khawih tawh a ni.