KHAWTHLIR

Solar lantern sem
Lungleia awm 1st. Assam Rifles chuan October 24, Thawhlehni khan Siaha district-a khaw pahnih - Siata leh Chhaolo khuaah solar lantern an sem. Solar lantern hi chhungkaw tin an pek bakah, sikul, damdawi-in leh anganwadi-ahte an pe a ni.

Kawng siam dawn
PWD chuan vawiin aṭanga October 28 thlengin Raj Bhavan chhim lam gate aṭanga Tuikhuahtlanga PCCF office an siam dawn a, October 30-31 chhungin PCCF office leh Sikulpuikawn inkar kawng an siam dawn bawk. Kawng siam hna thawh chhungin he kawngpuiah hian lirthei eng chi pawh tlan phal a nih dawn loh thu Traffic SP chuan a tarlang. Hnathawh hun hi zan dar 8 aṭanga a tûk zing dar 2 inkar zel a ni ang.

Intluktlânna zirho
J Buana College-a Equal Opportunity Cell chuan nimin khan an college hall-ah 'Awareness campaign on Gender Sensitization' an buatsaih a, Lunglei chief judicial magistrate Julie Lalrinzami'n ‘In chhung khur, khawtlang, politics leh inneihnaahte mipa leh hmeichhiate dinhmun a intluktlang em?’ tih thupui a sawi.

Minister-in kâwm
Minister KS Thanga chuan a department chan, Irrigation & Water Resources department officer-te nimin khan a kâwm. KS Thanga chuan, thawktute chu mipuite tan inpekna rilru pû a, ṭhahnemngai taka thawk tur leh anmahni dawrtute tan dàwr nuam taka awm zel turin a chah. IWR department-ah hian post 225 bakah, CSS hnuaiah mi panga nen, a vaiin post 230 a awm a, post 38% vel chu hnawhkhah loin a awm mek a ni.

PUC-ah workshop
Mizoram University-a Incubation Centre chuan nimin khan Pachhunga University College seminar hall-ah 'Entrepreneurship development in e-waste management' tih thupui hmangin national workship buatsaih a ni a, vawiinah chhunzawm a ni ang. Electronic hnâwmhnawk (e-waste) hman ṭangkai dante zirho a ni.