Zirlai lâk belh dan ngaihtuah turin Kohhran leh mimal college ngen Aizawlah college admission diltu ṭhahnem

Higher & Technical Edcuation (HTE) minister Dr R Lalthangliana chuan, nimin khan a pisaah Mizorama kohhran leh private college principal-te a kâwm a, zirlai lâk belh dan ngaihtuah turin a ngen. Aizawl khawpuia college hrang hrangah kum dang aiin kuminah admission dil an tam zawk hle nia thu dawn a ni.

HTE Minister R Lalthang­liana chuan, college admis­sion chungchangah zirlaite'n kum hmasa lamah pawh seat indaih lohna vanga harsatna an tawh ṭhin laiin, kuminah phei chuan Covid-19 vanga lo haw, zirlai tam tak phaia an zirna chhunzawm remchang tawh lo an awm dawn tih a sawi a, "Hei vang hian sorkar lu a hai hle. Zirlai admission chang lo eng emaw zat an awm thei dawnin a lang," a ti.

Sorkar college-te pawh insang mar turin an ngen viau tih sawiin HTE Minister chuan, "Chuti chung chuan kan dinhmun hi a la khirh hle. Zirlai lâk belh thei turin in ngaihtuahna lo sêng ula, a theih ang anga ṭan la turin ka ngen che u a ni," a ti a; kohhran leh private college principal-te chu ṭanho a ṭul thu a hrilh. HTE Minister-in kohhran college leh private college prin­cipal-te a kawmnaa minister ṭawiawmtu, Mizoram Youth Commission chairman Dr Vanlalṭanpuia, MLA chuan, zirna quality ṭha zirlaite'n an hmuh a pawimawh thu sawiin, "College zirtirtu leh hmunhma pawh zirlaite rilru tiphûr thei zawnga buatsaih a ṭul," a ti.

HTE director K Lalrinzuali chuan, sorkar college ni lo tan pawh sorkarin dan leh thil pawi­mawh dang zawm tura a duante ṭha taka zawm a pawimawh thu sawiin, "A bik takin hripui léng karah hian thawhhona ṭha kan neih zel a pawimawh takzet a ni," a ti a; private college-te inrêlbàwl dan tur Establishment Rules sorkarin a buatsaih mek thu a sawi. Inhmuh khawmnaah hian Mizoram sorkarin permission a pek kohhran leh private college pakua-a principal-te an tel kim a, theihtawp an chhuah tur thu an sawi hlawm a ni. 

Thu dawn danin, Aizawla college zawng zawngin kum dang aiin kuminah Under graduate first semester admission dil an nei tam zawk vek a, an hmunhmain a zawh loh khawp admission diltu zirlai an awm vek hlawm. 

Aizawla under graduate first semester admission diltu tamna ber Pachhunga University College-ah dilna (application) 9,250 an dawng a, kum dangah chuan 7,000 vel an dawng ṭhin.

PUC Principal chuan, kum dang aia diltu an tam avangin department tinah lâk theih chin 10-in an tihsan vek thu te, kum danga sport quota-a 35 dah ṭhin chu 20-a tihhniam an rawt thu te, application thehluh hun an khâr tawh thute a sawi. 

Govt. Aizawl College Principal chuan, kum dang aiin application an dawn tam thu leh dilna thehluh hun an khâr tawh thu a sawi rualin, diltu an awm reng thu a sawi a, "Mi 700 chuangin admission an ti tawh a, loh theih lohah chuan zirlai sang khat vel lak theih kan inbeisei, mahse, kan hmunhmain a zo dawn lo hle a ni," a ti.

T Romana College hotute pawhin, kum dang aiin an college-a luh tum leh application thehlut an tam thu sawiin, "Mi 480 vel admit tura ruahman a nih laiin 2,000 chuang dilna a lut a, eng tin nge kan tih dawn kan hre lo, kan rilru a buai hle," an ti a; nu leh pa leh zirlaite'n ṭap chungin admit hrâm tura an ngen ṭhin chu hmuh hrehawm an tih ṭhin thu an sawi rualin, an hmunhmain a zawh ngang loh avangin rorel dan hriatthiam a harsat ṭhin thu an sawi. 

Aizawla college dangte pawhin Covid-19 léng vangin kum dang zawng aia zirlai lak belh tam tumin ṭan an la mek a, chutih rualin, an hmunhmain a zawh dawn loh avangin an ngaihtuahna a tibuai hle vek hlawm a ni.