CM sum tamzia sawi ṭhin dik lohzia tichiangtu chu hlawh pawh hêk hi a ni - MPYCC

Mizoram Pradesh Youth Congress Committee (MPYCC) chuan thuchhuah siamin, Covid-19 chungchanga hmalakna atan sorkar hnathawkte, minister leh MLA-te hlawh lâk ṭhen tura ruahmanna siam a ni chu, chief minister Zoramthanga'n Central-a sum a tamzia a aupui chiam ṭhin, pawh luh dan thiam riaua a insawi ṭhin chu thu tak a nih lohzia nemnghettu a nih thu an tarlang.

MPYCC chuan, "Covid-19 do nan Mizoram sorkarin a budget aṭanga sum tam tham hman a la nei lo chung te, Central Disaster Relief Fund leh DONER aṭanga nuai sang tam tak a hmuh te, CM Relief Fund-ah mi inphalte'n vaibelchhe tél an chhûn luhpui a, sum tamzia sawi a ni reng chunga Finance minister Pu Zoramthanga, sorkar hnathawk a tê ber aṭanga a lian ber thlengin tuikhurpui kang chat nghahpui a, tui chawipui a ngai ta hi lungchhiat thlak kan ti tak zet a ni," an ti.

CLP leader Zodintluanga'n press statement a tihchhuah­ah, Mizoram sorkar hnathawkte thla riat chhung sorkara sum thawh tura tih leh sorkar inhuamna ropui a tihzia a tarlang a; chutih rual­in, Mizoram sorkar chu sum leh paiah ṭanpui a ngai a nih chuan minister leh MLA-te chu a che hmasa ber tur leh hlawh aṭanga sum thawh hmasa ber tur an nih thu a sawi hnua Assembly Speaker hoa MLA-te'n an hlawh thawh an rel chu lawmawm an tih thu an sawi.

Congress ṭhalaite chuan, Covid-19 do nana sorkar hnathawkte leh MLA sum thawh tlingkhawm tur chu sorkarin fimkhur tak leh langtlang takin hmang se an duh thu an sawi bawk.