Medical college din tura thil ṭulte Peih fel vek a ni tawh - CM Hawla
Chief minister Lal Thanhawla chuan nimin khan CMO-a Cabinet room-ah thuthar thehdarhtute a kâwm a; State referral Hospital-a medical college din turin a ṭul ang zawng zawng chu sorkarin a peih tawh thu a sawi.
CM Lal Thanhawla chuan, medical college, Mizoram Institute of Medical Education & Research (MIMER) din tak tak turin sorkarin hma a lak thu a sawi a, "Medical college hi din kan tumna a rei tawh a, sum sen tur a tam avangin kan huphurh deuh ṭhin. Mizoramah hian doctor kan indaih lo hle a, national average ai pawhin kan hniam zawk. National-ah chuan doctor pakhatin mi 1,648 an enkawl ang a nih laiin, Mizoramah chuan doctor pakhatin mi 1,832 an enkawl ang a ni," a ti.
Doctor indaih lohna phuhrûk nan Mizoram sorkarin medical college nei ngei tura hma a lak thu sawiin Lal Thanhawla chuan, "A ṭul ang zawng zawng sorkarin a peihfel tawh. Medical Council of India (MCI) lamin ti tura min duh ang zawng zawng pawh tih vek a ni tawh," a ti a; MCI-in engtik hunah pawh rawn endik se, sorkar lam chu a inrin reng thu a sawi.
Chief Minister sawi danin, Council of Ministers chuan MIMER principal atana Dr Lallukhum Fimate rawtna chu an pawm tawh a; medical college din tura thawktu awm ngai zat 629 pawh State Referral Hospital, Falkawnah an awm theihna tana hna lak belh tur rawtna pawh an pawm bawk.
Hna lak belh tur atan hian advertisment chhuah a ni dawn a, a ṭul anga lak nghal a ni dawn. Medical college atan hian a behchhan damdawi-inah khum 250 tal a awm a ngai a, mahse, State Referral Hospital-ah hian khum 300 dah tum a ni.
Lal Thanhawla chuan, phaia inenkawl ngai lo turin State Referral Hospital chu tihchangtlun tum a nih thu sawiin, "Khawl leina atan NEDP aṭangin nikumah cheng vbc. 28 leh kuminah vbc. 15 dah a ni. Hmanraw a ṭul ang ang lei zel a ni a, CT Scan an la nei lo a, tender ṭum hnih chhuah a ni tawh a, mi pakhat chauhin an chhan avangin, manufacturing company dawr mai turin kan ti a ni," a ti.
Kum 2007 vel aṭangin State Refferal Hospital din a, medical college nei tura ruahmanna an siam tawh thu sawiin CM Hawla chuan, "Kan tlak tak avangin kan chhunzawm thei lo. Sorkar tharin an chhunzawm a, hnathawh a ṭha lo hle," a ti a; MCI lamin an endik ṭumin damlo hire (damlo anga mi tute emaw lantir) ngai hial khawpa hnathawh mumal a nih loh thu a sawi.
Lal Thanhawla chuan, MCI chu medical college din kawngah an fimkhur a, an uluk hle tih sawiin, "State hrang hrangah bumna an tawh nasat ṭhin avangin an fimkhur hle. Tunah chuan eng hunah pawh rawn kal se tling ngei turin ruahmanna kan siam a ni," a ti.
Chief Minister ṭawiawmtu Health department hotute sawi danin, MCI-in an rawn endik leh hunah an pawm a nih chuan MIMER atana batch hmasa ber chu August 2018 vela ṭan theih beisei a ni. Subject pathum - anatomy, psychology leh bio-chemistry-ah bul ṭan a ni ang.
MIMER-a thawk tur hian assistant professor tur chu Mizoram chhung aṭanga hmuh theih beisei a ni a, associate professor leh professor tur erawh state dang aṭanga lak a ngai dawn thung.
MIMER atana hna lak thar tur
Category Post zat
Teaching faculty 168
Administrative staff 40
Technical staff 55
Rural Health Training Centre 10
Urban Health Training Centre 10
Ancillary staff 95
Nursing staff 251
(Kum nga chhungin a tahtawla lak tum a ni)