Cheng nuai 792 hman dan leh hmanna tilang turin ZPM Ṭhalaiin sorkar an phût

Zoram Peoples' Movement (ZPM) party ṭhalaite chuan, National Bamboo Mission (NBM) hnuaia cheng nuai 792 Mizoram sorkarin a dawn chu hman a nih dan leh a hmannate tarlang turin Mizoram sorkar an phût.

Nimina ZPM Ṭhalai thu­chhuahin a tarlan danin, Mi­nistry of Agriculture & Farmers Welfare hnuaia Department of Agriculture, Cooperation & Farmers Welfare-a under secretary (NRM) Harit Kumar Shakya-in May 3, 2019 khan state tina Bamboo Mission-a state mission director-te hnenah kum 2019-20 chhunga NBM kalpuina atan Central-in sum a pawmpui zat hriattirna a tichhuak a ni.

NBM hnuaia sum hmuh chu mau/rua hmun siamna tur te, sawngbawlna tur siamna leh bamboo industry tihhmasawnna tur a ni a, Mizoram dawn tur zat chu cheng nuai 792 niin, chumi aṭanga 10% chu state sorkarin a tum ve a ngai thung.

ZPM Ṭhalai chuan, "Kum 2019-20 chhungin NBM kal­tlangin Mizoram State Bamboo Mission-in pawisa eng zat nge a dawn tawh a, chumi aṭang chuan eng zat nge sên a nih tawh, tih leh, eng atana hman nge a nih, tihte hi MNF sorkar kan zawt a ni," an ti.

March 2020 tìr lama Hmunpui rama Model Bamboo Plantation-a raw chíng turte Lengpui khaw mi 126 leh Hmunpui khaw mi 100-te hnena lo vahna tur Rs. 10,000 leh mangkhawhna tur Rs. 2,500 ṭheuh sorkarin a pek chu SBM aṭanga pek nge, SEDP aṭanga pek tih sawi chiang turin Mizoram sorkar an phût bawk.

ZPM Ṭhalai chuan, NBM aṭanga sum tam tham tak hmuh Mizoram sorkarin a hman dan chu an chhui zui zel dawn tih an tarlang a ni.