Housing & Urban Affairs scheme-ah NE-ah Mizoramin a thawk ṭha ber

Union Housing and Urban Affairs minister Hardeep Singh Puri chuan NULM leh GBS hnuaia hna thawhna atan UDPA minister Zodintluanga hnenah nimin khan Guwahati-ah work order cheng vbc. 22.89 hû a hlan. Nimina Guwahati-a review meeting-ah Mizo­ram chu hmarchhak state zinga HUA ministry hnuaia scheme hrang hranga hna thawk ṭha ber a nih thu puan a ni.

Ministry of Housing and Urban Affairs hnuaia mission/scheme hrang hranga hna thawhte thlir letna, review meeting chu nimin khan neih a ni a; hmarchhak state hrang hranga Urban minister-te telin, Mizoram aṭangin UDPA minister Zodintluanga bakah, UDPA department-a secretary Dr C Vanlal­ramsanga leh officer dangte an tel.

Nimina review meeting-ah hian Union minister Hardeep Singh Puri chuan UDPA minister Zodintluanga hnenah 10% GBS thawh mek atan sanction order cheng vbc. 15.89 hû leh National Urban Live­lihoods Mission (NULM) hnuaia hna thawh mekna atan cheng nuai 700 hû sanction order a hlan. Union Minister chuan, Atal Mission for Rejuvenation and Urban Transformation (AMRUT) hnuaia hna thawh chhunzawmna tur second instalment cheng vbc. 56.09 pawh pek thuai a nih tur thu a sawi.

UDPA department hotute hnen aṭanga thu dawn danin, Housing & Urban Affairs ministry chuan hmarchhak state zingah Mizoram chiah duhthusam anga AMRUT kalpui a awm thu an tarlang a; Mizoram chu India rama AMRUT hnuaia hna thawk ṭha zual 10 zingah a tel.

AMRUT scheme-ah hian Mizo­ram chu mission period chhunga State Annual Action Plan (SAAP) zawng zawng pawmsak tawh awmchhun a ni a, SAAP pathum pawm tawha first instalment ṭheuh pawh a lo dawng tawh. Minister Zodintluanga'n second instalment pe chhuak thuai tura a ngenna chu Union Minister chuan, a rang thei ang berin cheng vbc. 56.09 pek chhuah a nih tur thu a sawi a ni.

National Urban Livelihoods Mission (NULM)-ah pawh Mizo­ram chu hmarchhak bialah a ti ṭha ber a, India ram pum ranking-ah 18-na a hauh mek. NULM hnuaia sub-mission pahnih - SUH leh SEP-ah Mizoram chu India rama thawk ṭha ber zinga a tel thu tarlan a ni bawk.

Review meeting zawha press meet-ah HUA minister Hardeep Singh Puri chuan, Mizoram chu hmarchhak state zingah AMRUT, NULM leh scheme dang ṭhenkhatah thawk chak ber leh hma hruaitu a nih thu a sawi.

Hardeep Singh Puri chuan, Mizoram chu hmarchhak state zingah páwn lama inthiar awm lohna, open defecation free (ODF) hmasa ber tura beisei a nih thu sawiin, Mizoram aṭanga telte chu December 2017 hma ngeia ODF ni thei tura ṭan la turin a ngen a ni.

UDPA minister Zodintluanga pawhin, Mizorama district head­quarters pariat zingah, Lawngtlai district tih loh chu ODF-a puan a nih tawh thu a sawi a; HUA Ministry lamin verification an tihchak chuan December 2017 ral hmain Mizoram pum chu ODF-a puan theih beisei a nih thu a sawi bawk.

Nimina review meeting-ah hian hmarchhak state-a Urban minister-te an tel a; Housing for All (Urban), Swachh Bharat Mission (Urban), Smart Cities Mission leh NERCCDIP (ADB)-te pawh an sawiho a ni.