MZU-ah International Conference

Nimin khan Mizoram University (MZU)-ah ‘Natural Resources Management for Sustainable Development and Rural Livelihoods’ tih thupui hmangin international conference buatsaih a ni a, Governor Lt.Gen. Nirbhay Sharma-a'n a hmanpui.

Governor chuan, mihringte’n mahni hamṭhatna kan ngaihven luat vangin leilung hausakna leiin a hnawhkhah leh theihna aia nasain kan hmang ral niin a sawi a, "Renchem kan zir a nih loh pawhin, kan mamawh phuhrûkna tur hnár dang kan zawn a ngai. Mihringte chuan kan khawsak a nawm zawkna tur kan ngaihtuah ṭheuh a, leilungin min dâwl theih chin ang zela ṭhan kan zir a ngai a ni," a ti.

Himalaya tlang ramte tana hmasawnna tlo a pawimawh a, chu chu tuna hun tawn mek nena inmil tak a nih thu sawiin Larsap chuan, "Tlang ram, a bikin Mizoram angte harsatna zir chiang a, a sutkian dan tur ṭha zawk conference chhunga an sawiho ni se a duhawm hle," a ti a; sawihonate chu a taka chantir a nih theih ngei a duh thu a sawi.

Khualzahawm, Geological Survey of India director N Kutumba Rao chuan, India leilung an enthlithlai vek tawh thu sawiin, "Mizoram hian leihnuai hausaknate nei tam loin, industry lian bun theih ni lo mah se, agriculture, forestry, horticulture leh thil dang dangahte hmasawnna tur tam tak hmuh a ni," a ti.

Conference hawnna inkhawmah hian MZU vice chancellor Prof. Lianzela'n MZU hmalaknate a tarlang a ni.