Champhai district-ah thisen endik zinga 3.23%-in HIV hrik an pâi

Kum 2011 aṭanga kumin September thla thleng khan Champhai district-ah thisen endik mi 41,513 zinga 3.23% chu HIV hrik pai an ni a, nu naupai thisen endik 23,182 zinga 0.71% chu HIV hrik pai an ni tih hmuh chhuah a ni.

Champhai DC Vanlalngaihsaka hoa October 25, Nilainia DC conference hall-a Champhai District AIDS Prevention and Control Committee (DAPCC) ṭhutkhawmnaa an tarlan danin, Champhai district-ah kum 2013 aṭanga September 2017 thlenga HIV inkai chhawnna tam ber chu mipat hmeichhiatna niin, 51.40% a ni a, hei hi Mizoram puma HIV hrik kai chhan 71% aiin a hniam zawk.

Champhai district-ah hian, tun hnaia HIV hrik inkai chhawnna darh chak ber chu inchiuna hriau aṭangin a ni a, hriau aṭanga kai zat chu 42.9% niin, hei hi Mizoram pum average 30% aiin a sang zawk. Thisen dawn (blood transfusion) aṭanga kai a awm lo a; nu aṭanga nautein a kai 4% leh kai chhan hriat loh 1.80% an awm.

HIV+ve tam ber chu kum 25-34 inkar niin, 46.40% an ni a; kum 15-24 inkart 22.15%, kum 35-49 inkar 18.46%, kum 14 hnuai lam 4.5% leh kum 50 chung lam 0.32% an awm. Kumin January-September chhunga kai tam ber chu kum 25-34 inkar (43.82%) an ni.

Meeting-ah hian Champhai district-a HIV/AIDS dinhmun tlangpui thlirhona a nih bakah, hmalak zel dan tur sawihona a ni a; a kaihhnawih department hrang hrangte hnathawh, hmalakna leh mawhphurhnate sawihoa enzui a ni bawk.

Meeting chuan, a tam thei ang ber HIV/AIDS chungchangah inhrilhhriatna neih ni se, a ti a; chuta tan chuan a kaih­hnawih department hrang hrang, media, tlawm­ngai pawl leh khawtlang hruaitute thawkho zel tura hmalak ni se, a ti.