Chief Minister-in a eiruk loh thu a sawi hi Mizo mipuite min zahloh naah kan ngai - BJP

BJP, Mizoram chuan thuchhuah siamin, chief minister Lal Thanhawla'n October 24-a Thenzawla a thusawi naah cheng khat pawh a eiruk loh thu a sawi chu Mizo mipuite a zah lohzia tarlanna a nih thu an tarlang.

BJP chuan kum 2008 leh kum 2013 inkara Lal Thanhawla sum neih pung chak lutuk chhui chian phutin July 18, 2017 khan ACB-ah FIR an thehlut tih sawiin, "Document-a a tarlan ang chuan Chief Minister hian thla tin cheng nuai 11 chuang kum nga chhung 2008 leh 2013 inkar hian lalut zel ang a ni a, a thla khat hlawh erawh Rs. 95,000 a ni thung," an ti.

Chief Minister hian BJP FIR theh­luh chu a department chan Vigilance department a chhan let tir nia sawiin BJP chuan, "October 18, 2017 Vanglaini chhuakah CM leh a thawhpuite chhui theih an ni loh thu a chhuah tir te te a, 'Chhura a awm ta love' ti ni awm takin a eiruk loh thu a puang ta a ni," an ti a, Chief Minister chu a ti awm tawk lek tia an ngaih thu an sawi.

BJP chuan Mizoram Chief Minister chu India rama Chief Minister hausa top 10 a tling phak, Chief Minister tha thlannaa lang pha leh si lo a nih thu sawiin, "Hetiang Chief Minister kan nei hi India ramah Mizo te min tithangtlawm naah kan ngai. India ramah hian hnam zahawm leh ropui hi Pu Lal Thanhawla kaihhruaina hnuaiah hian engtikah mah kan ni ngai dawn lo a ni," an ti.

Vision nei lo Chief Minister neih chu ram ṭhanmawhbawk a ni a nih thu sawiin BJP chuan, "A kaihhruai sorkar­ah hian khawizu leh hnute tui aiah zu a luantir a, Mizo mipuite hi kan ngawih renga awmhmuna khawvar kan nghah mai chuan kan boral anga, kan hnam hi a dingchhuak leh ngai tawh lo ang," an ti.