Loneitute puala training khar

State Agriculture Management & Extension Training Institute (SAMETI)-in loneitu pawl FPO hruaitute tana an buatsaih 'Promotion of Organic Farming in Mizoram' chu nimin khan Mizoram Food Processing Research & Training Centre (MFPRTC), Seling-ah a hmawrbawk­na hun hman a ni a, SAMETI director RK Nithanga’n a hmanpui a ni.

RK Nithanga chuan loneitute’n a thu-a an zir, a practical-a an tihchhinna hmun ṭha Mizoramin kan neih loh avangin buaina kan nei ṭhin tih sawiin, ".Seling-a Mizoram Food Processing Research & Training Centre alo ding ta hi Mizoram kuthnathawktu leh loneitute tan a vanneihthlak hle," a ti.

MFPRTC-a centre director Joseph L. Ralte chuan MFPRTC alo din chhan chu kuthnathawktu leh mahni kutkawih eizawnna daptu leh entrepreneur te chawikanna atan a nih thu a sawi.

Training hmawrbawkna hunah hian kuthnathawktute chu thlai leh thei silfai, a quality thliar hran hnua thil chi hrang hranga sawngbawl theih a nih dan, a vawnṭhat dan leh a hrisel leh hrisel loh enchian pawimawh dante zirtir an ni.