KHAWTHLIR

Assembly session
Governor Lt.Gen. Nirbhay Sharma chuan October 15, 2017 khan notitication tichhuakin, Legislative Assembly pasarihna session vawi 14-na chu Assembly House-ah November 14, 2017 chawhma dar 10:30 a ṭan turin a ko.

In sak sak
Lengpui Branch YMA chuan an dinchampha lawmna atan an huam chhunga hmeithai pakhat in October 24 leh 25 kan hnatlangin an sak sak. In sakna atan hian bialtu MLA John Rotluangliana leh H Lalzirliana, Mamit-in Rs. 10,000 ve ve an thawh bakah, khawtlanga mi inphalten pawisa leh insakna hmanrua an thawh a ni. In hi sq. ft. 18 a zaua sak a ni.

Inven dan zir
Mizoram Remote Sensing Application Centre (MIRSAC) buatsaihin nimin khan Mamit DC conference hall-ah 'Workshop on Hazard Risk & Vulnerability Assessment (HRVA)' buatsaih a ni a; Mamit khawpui veng hrang hrang dinhmun leh invenna kalpui theih dan turte zir a ni. Workshop-ah hian Mamit khawpui chhunga department hrang hrang hotute leh khawtlang hruaitute an tel.

Zirlaite Ni
Vawiin, October 27 hi MZP din champha a ni a; MZP chuan, an din champha hi Zilaite Ni atan an hman ṭhin thu tarlangin, Mizo zirlai zawng zawng duhsakna an hlan. Zirlaite Ni hi kum 2006-ah hman ṭan a ni a; MZP chuan, zirlaite chu an remchan dan anga Zilaite Ni hmang ve turin an chah a ni.

Mizo nula chhuang
MPC party Women Wing chuan thuchhuah siamin, Bulgaria khawpui Sofia-a International Boxing Championship Senior & Youth Women-ah Lalfakmawii Ralte, Vaivakawn-in kg. 81+ category-ah hnehna changa a champion chu fakawm an tih thu leh an chhuan tak zet thu an tarlang. Lalfakmawii Ralte hi Mizoram sorkarin lawmpuina leh chawimawina hlan ve ngei se an duh thu an sawi bawk.