CLP Leader-in ramrî a tlawh kual

Congress Legislature Party (CLP) leader Zo­dintluanga Ralte chuan nimin khan Mamit district leh Kolasib district-a Assam leh Tripura nena inrina vengtu task force leh YMA duty-te a tlawh kual a, thilpek chi hrang hrang a hlàn.

Zodintluanga Ralte chuan, Congress MLA-te bial chu Mizoram ramri nei vek a nih avangin an bial ṭheuh an vil a ngai a, chu vang chuan an duh anga hmain Mamit leh Kolasib district-a ramri-ah an kal hma thei lo tih a sawi a, "Hripui laka kan him theih nana in hnathawhte a ropui kan ti a, a hmun ngeia rawn hmuhpui che u kan duh a ni," a ti.

CLP Leader chuan, Aizawl lamah sorkar leh mipui an inthlahdul ṭan tih sawiin, "Harsa tak chung pawhin nangni tal hian ramri in lo vèn hrâm hrâm a ngai a ni. Covid-19 hi ni 21 chhunga lang chhuak tur niin mithiamte'n an sawi a, amaherawhchu, ni 40 chuang India ram kan inkharkhip hnuah pawh a vei an pung zel a ni," a ti a; Tripura leh Assam-ah hripui vei an pun zel avangin ngawrh taka ramri ven a ngaih thu a sawi.

Ramria duty task force leh YMA-te khauh taka ramria an duty laia ram chhung lam thlahdul a ni hma lutuk chu pawi an tih thu sawiin Zodintluanga chuan, "In thawhrimnain awmzia a awm lo ang tih a hlauh­awm hle. Eizawnna kawng zawh thei loa in awm rei tawh avang­in duty tur inhmuh zawh loh maite pawh hlauhthawnna a lian tawh hle a ni," a ti.

CLP leader Zodin­tluanga Ralte hian ramri hmun hrang hranga duty-te hnenah pawisa leh hmanruate a pe a ni.