NIA-te'n Naga hel NSCN-K-te chhui zui dawn

National Investigation Agency (NIA) chuan Naga hel National So­cialist Council of Naga­land-Khaplang (NSCN-K)-te chu chuizui an nih tur thu an tarlang.

NIA hian Myanmar-a hmunpui nei NSCN-K hruaitu Niki Sumi-a nupui Shelly Sumi-i chenna-in chu Thawhlehni khan an dap a, pwisa fai cheng nuai 27.90 zet an man a ni. He thil thlen hnu hian NIA chaun NSCN-K-te hi chhuizui zel an nih tur thu an puang a ni.

Shelly-i chenna bakah hian Ikheli Yeptho, Shutoli leh Hozheli-te chenna pawh dap a ni a, mobile phone 12, laptop (3), computer hard disk leh document pawimawh 33 zet an man bawk.

NIA chuan NSCN-K hruaitu lawk Niki Sumi hi man tuma zawn mek a nih thu an sawi a, June 4, 2015-ah New Delhi-a mi 18 thahnaah khan mawhphurtu zingah a tel tih an sawi. Amah bakah hian NSCN-K mi leh sa Starson Lamkang leh Major General Neym­lang-te pawh an inhnam­hnawih thu a sawi.

National Investigation Agency hian kumin April thla khan Shelly in hi an lo dap tawh bawk a, hemi ṭum hian Myanmar aṭanga lakluh nia hriat pawisa ṭhahnem tak an lo man tawh bawk a ni.

National Socialist Council of Nagaland - Khaplang (NSCN-K) hi Nagaland-a helpawl hlun leh lian ber te zinga mi an ni.

Sorkar laipui chuan kum 2001 khan inremna a lo ziahpui tawh a, March 2015 khan inbiakna neih leh ni mah se, inrremna tluantling a la awm thei lo a ni. Nagaland, Aruna­chal Pradesh leh Manipur-a pawikhawihna thleng hrang hrangah an inhnamhnawih a, India sipaite chu an bitum ber an ni.